پنجاب میں فلم انڈسٹری کے فروغ کیلئے اتھارٹی بنانے کا فیصلہ

12-22-2025

(لاہور نیوز) پنجاب میں فلم انڈسٹری کے فروغ کیلئے پنجاب فلم ڈویلپمنٹ اتھارٹی تشکیل دینے کا فیصلہ کر لیا گیا۔

پنجاب اسمبلی میں پنجاب فلم ڈویلپمنٹ اتھارٹی ایکٹ 2025 پیش کر دیا گیا جس کی کاپی دنیا نیوز  نے حاصل کر لی۔ پنجاب فلم ڈویلپمنٹ اتھارٹی کے ذریعے فلم سازی، ڈرامہ اور ڈاکیومنٹریز کی سرپرستی کی جائے گی، نئی فلم پالیسی، قواعد و ضوابط اور لائسنسنگ کا جامع نظام متعارف کروایا جائے گا جبکہ فلم سازوں کو سہولیات، اجازت ناموں اور ون ونڈو آپریشن کی سہولت فراہم کی جائے گی۔ مجوزہ بل میں مقامی اور غیر ملکی سرمایہ کاری کے فروغ کیلئے خصوصی مراعات دینے، فلم سٹوڈیوز، فلم سٹی اور پوسٹ پروڈکشن سہولیات کے قیام کی راہ ہموار کرنے کی شقیں شامل ہیں۔ اس کے علاوہ نئے ٹیلنٹ کی تربیت کیلئے ٹریننگ پروگرامز شروع کئے جائیں گے جبکہ فلم انڈسٹری کیلئے فنڈنگ، گرانٹس اور سبسڈی کا نظام بھی متعارف کروایا جائے گا۔ اس بل کے تحت فلم کے ذریعے پنجاب کی ثقافت، سیاحت اور مثبت تشخص کو اجاگر کیا جائے گا، پنجاب فلم ڈویلپمنٹ اتھارٹی کو فلم انڈسٹری سے متعلق شکایات اور مسائل کے حل کا اختیار بھی حاصل ہو گا۔ ذرائع کے مطابق بل کو دو ماہ کے لیے متعلقہ کمیٹی کے سپرد کر دیا گیا ہے جو مقررہ مدت میں اپنی رپورٹ پیش کرے گی، کمیٹی کی منظوری کے بعد بل پنجاب اسمبلی سے منظور کروایا جائے گا جبکہ حتمی منظوری گورنر پنجاب دیں گے۔