بانی پی ٹی آئی کی مبینہ کرپشن ، چوریوں کی کہانیاں زبان زدِ عام ہو چکی ہیں:عظمیٰ بخاری

12-20-2025

(لاہور نیوز) صوبائی وزیر اطلاعات ونشریات عظمیٰ بخاری نے کہا ہے کہ قانون سب کے لیے برابر ہونا چاہیے اور کسی کو بھی رعایت نہیں ملنی چاہیے۔

 عظمیٰ بخاری نے اپنے بیان میں بانی پی ٹی آئی پر شدید تنقید کرتے ہوئے الزام عائد کیا ہے کہ انہوں نے چور دروازے سے اقتدار میں داخل ہونے کی کوشش کی۔ ان کا کہنا تھا کہ بانی پی ٹی آئی کو ہر کسی کو چور اور ڈاکو کہنے کی عادت تھی جبکہ حقیقت میں ان کے اپنے دور میں چوریاں اور کرپشن ہوئی، انہوں نے الزام لگایا کہ فیض حمید کے ساتھ گٹھ جوڑ کے ذریعے ایک مخصوص بیانیہ بنایا گیا جس کے تحت مخالفین کو چور ڈاکو قرار دیا گیا۔ صوبائی وزیر کا کہنا تھا کہ اسی مبینہ گٹھ جوڑ کے نتیجے میں بانی پی ٹی آئی اقتدار میں آئے جبکہ آف شور کمپنی چیریٹی کے پیسوں سے بنانے جیسے الزامات بھی سامنے آئے۔عظمیٰ بخاری نے دعویٰ کیا کہ بنی گالہ کی مبینہ جعلی دستاویزات کے باوجود پروجیکٹ فیض حمید کے تحت انہیں صادق و امین قرار دیا گیا۔ مسلم لیگ (ن) کی رہنما کے مطابق بانی پی ٹی آئی کی مبینہ کرپشن اور چوریوں کی کہانیاں اب زبان زدِ عام ہو چکی ہیں، یہ تاثر دیا گیا کہ وہ شاید ہیروں کا کاروبار کرنے ہی اقتدار میں آئے تھے مگر حقیقت اس کے برعکس ہے۔ عظمیٰ بخاری نے مزید کہا ہے کہ احتساب بلا امتیاز ہونا چاہیے اور قانون کی حکمرانی سب پر یکساں طور پر لاگو ہونی چاہیے۔