قبضہ مافیا اور پلاٹ فراڈ کے خلاف پنجاب میں کڑی قانون سازی کی تیاریاں

12-19-2025

(لاہور نیوز) پنجاب میں قبضہ مافیا اور پلاٹ فراڈ کرنے والوں کے خلاف سخت قانون سازی کی تیاریاں کی جا رہی ہیں تاکہ غیر قانونی ہاؤسنگ سکیموں اور جعلی فائل سسٹمز کے خلاف عوامی شکایات کا موثر تدارک کیا جا سکے۔

وزیر ہاؤسنگ بلال یاسین کی صدارت میں بورڈ آف ریونیو میں اہم اجلاس منعقد ہوا، جس میں ایس ایم بی آر نبیل جاوید، سیکرٹری ہاؤسنگ نورالامین مینگل، ڈی جی ایل ڈی اے، پی ایل آر اے اور دیگر افسران  نے شرکت کی۔ اجلاس میں فیصلہ کیا گیا کہ پنجاب لینڈ ریکارڈ اتھارٹی سوسائٹیوں کی منظوری کیلئے سافٹ ویئر تیار کرے گی اور ڈیجیٹل ریونیو ریکارڈ، این او سیز کی فراہمی سمیت دیگر امور 90 دن میں مکمل کئے جائیں گے۔ اجلاس میں غیر قانونی ہاؤسنگ سکیموں کی تشہیر روکنے، پراپرٹی ڈیلرز کو رجسٹرڈ کرنے اور قوانین کی خلاف ورزی کرنے والوں کے اکاؤنٹس و اثاثہ جات منجمد کرنے کی سفارشات پیش کی گئیں۔ صوبائی وزیر ہاؤسنگ بلال یاسین  نے کہا کہ سیلابی پانی کی گزرگاہوں پر آبادکاری کی اجازت نہیں دی جائے گی اور منظور شدہ اراضی سے زائد پلاٹوں کی فروخت پر پابندی ہو گی۔ انہوں نے مزید کہا کہ الاٹ شدہ اراضی کی اقساط مکمل کرنے کے بعد جگہ تبدیل کرنے پر فوری ایکشن لیا جائے گا اور جعلسازی، دھوکہ دہی اور فراڈ میں ملوث عناصر کے خلاف سخت کارروائی کی جائے گی۔