لاہور میں پیلیکن ٹریفک سگنلز کی تنصیب کا دائرہ کار بڑھانے کا فیصلہ

12-16-2025

(لاہور نیوز) پنجاب حکومت اور ٹریفک انجینئرنگ اینڈ پلاننگ ایجنسی (ٹیپا) نے ٹریفک سگنلز پر رش اور لمبی قطاروں کے مؤثر اور جدید حل کے طور پر لاہور میں پیلیکن ٹریفک سگنلز کی تنصیب کے منصوبے کا دائرہ کار بڑھانے کا فیصلہ کر لیا۔

یورپی ممالک کی طرز پر جدید ٹریفک مینجمنٹ سسٹم لاہور میں متعارف کرا دیا گیا ہے، جس سے ٹریفک کی روانی اور راہگیروں کی حفاظت میں نمایاں بہتری متوقع ہے۔ محکمہ ہاؤسنگ پنجاب کے مطابق مال روڈ پر پیلیکن ٹریفک سگنلز کے کامیاب پائلٹ پراجیکٹ کے بعد دیگر اہم شاہراہوں پر بھی اس جدید نظام کی تنصیب کا فیصلہ کیا گیا ہے۔ پہلے مرحلے میں لاہور کی 20 سے زائد اہم سڑکوں پر یہ سسٹم لگایا جائے گا، منصوبے کی تنصیب محکمہ ہاؤسنگ کے تحت ٹیپا کرے گا، جبکہ محکمہ ہاؤسنگ اینڈ اربن ڈویلپمنٹ کی اس ضمن میں تیار کردہ اہم سمری کو صوبائی کابینہ سے منظوری بھی مل چکی ہے۔ ٹیپا اور سٹی ٹریفک پولیس کے اشتراک سے شہر کی اہم شاہراہوں کا انتخاب کیا گیا ہے، پیلیکن ٹریفک سسٹم کی تنصیب کا عمل آئندہ 5 ماہ میں مکمل کئے جانے کا ہدف مقرر کیا گیا ہے، ویڈیو وہیکل ڈٹیکشن سسٹم کے ذریعے ٹریفک مینجمنٹ کو خودکار بنایا جائے گا، جس سے مؤثر لین ڈسپلن کے قیام میں بھی مدد ملے گی۔ محکمہ ہاؤسنگ کے مطابق منصوبے کے تحت مرکزی اربن ٹریفک کنٹرول سسٹم بھی نصب کیا جائے گا، جبکہ زیبرا کراسنگ پر ٹریفک سگنلز سے منسلک ایل ای ڈی لائٹس لگائی جائیں گی۔ اس جدید نظام کو سمارٹ سٹی سسٹم سے بھی منسلک کیا جائے گا، جس سے اہم ٹریفک ڈیٹا ریکارڈ کیا جا سکے گا، منصوبے کی تکمیل کے بعد پیدل مسافر باحفاظت سڑک پار کر سکیں گے جبکہ ٹریفک سگنلز پر رش اور لمبی قطاروں کا مسئلہ بھی نمایاں حد تک کم ہو جائے گا۔ منصوبے میں جی پی او، لاہور ہائیکورٹ، ریگل، گورنر ہاؤس، ڈیوس روڈ اور کینال روڈ جنکشن شامل ہیں، اس کے علاوہ ظفر علی روڈ، فورٹریس سٹیڈیم، جناح چوک، سرفراز رفیقی روڈ، سیکرٹریٹ، فیروز پور روڈ، مسلم ٹاؤن موڑ، بھیکیوال، دبئی چوک، برکت مارکیٹ، فردوس مارکیٹ، عسکری 10 اور پرویز اسلم چوک کے ٹریفک سگنلز بھی منصوبے کا حصہ ہوں گے۔