پنجاب کے ہزاروں نجی سکولوں کی رجسٹریشن کی مدت بڑھانے کا فیصلہ

12-13-2025

(ویب ڈیسک) پنجاب میں ہزاروں نجی سکولوں کو بڑا ریلیف دینے کا فیصلہ کر لیا گیا ہے، جس کے تحت نجی سکولوں کی رجسٹریشن کی مدت میں 4 سال کا اضافہ کیا جائے گا۔

مدت میں اضافے کے بعد اب رجسٹریشن 5 سال کیلئے جاری کی جائے گی، اس سے قبل نجی سکولوں کو صرف ایک سال کیلئے رجسٹریشن دی جاتی تھی، جس کے باعث انہیں انتظامی اور تعلیمی بورڈز سے الحاق کے عمل میں مشکلات کا سامنا رہتا تھا۔ نئی پالیسی کے تحت رجسٹریشن کی مدت میں توسیع ملنے سے بورڈز سے الحاق حاصل کرنے میں نمایاں آسانی پیدا ہو گی، رجسٹریشن کے عمل کو شفاف اور مؤثر بنانے کیلئے رجسٹریشن کمیٹی میں تمام اضلاع سے ایک ایک نجی سکول کے نمائندے کو شامل کرنے کا بھی فیصلہ کیا گیا ہے۔ ذرائع کے مطابق رجسٹریشن کی مدت میں توسیع کیلئے محکمہ سکول ایجوکیشن کی جانب سے سمری پر کام شروع کر دیا گیا ہے، جسے باقاعدہ طور پر وزیر اعلیٰ پنجاب سے منظوری کیلئے پیش کیا جائے گا، سمری کی منظوری کے بعد نجی سکولوں کو 5 سال کیلئے رجسٹریشن جاری کر دی جائے گی، جس سے تعلیمی اداروں کو استحکام اور سہولت میسر آئے گی۔