گلوکار وارث بیگ ٹریفک قوانین کی خلاف ورزیوں کے موضوع پر بحث میں کود پڑے

12-13-2025

(ویب ڈیسک) مشہور گلوکار وارث بیگ بھی پنجاب میں ٹریفک رولز وائلیشن، جرمانوں اور سزاؤں کے موضوع پر بحث میں کود پڑے۔

گلوکار  وارث بیگ ٹریفک قوانین پر عملدرآمد کیلئے پنجاب حکومت کے اقدامات کے معترف ہیں، انہوں  نے ٹریفک رولز کی پابندی کا کلچر تشکیل دینے کے لئے وزیر اعلیٰ مریم نواز کی حکومت کی جدوجہد پر ایک   ویڈیو پیغام  سوشل میڈیا پر پوسٹ کیا، یہ ویڈیو پیغام فوراً ہی وائرل ہو گیا۔ پنجاب بھر میں ٹریفک قوانین پر سختی سے عملدرآمد  کروایا جا رہا ہے اور شہریوں نے بھاری چالان سے بچنے کیلئے لائسنس بنوانے کیلئے دفاتر کا رخ کر لیا ہے جس پر معروف گلوکار ’وارث بیگ ‘ نے پنجاب حکومت کی کاوشوں کی تعریف کرتے ہوئے اسے درست اقدام قرار دیا۔ ہر دلعزیز گلوکار وارث بیگ کا پیغام سوشل میڈیا پر صارفین کی توجہ کا مرکز بنا ہوا ہے ، اپنے پیغام میں ان کا کہنا تھا کہ "میں بہت خوش ہوں کہ صرف 10 دن میں 15 لاکھ ڈرائیونگ لائسنس بنے ہیں، حادثات کم ہو رہے ہیں، لوگ لائنوں میں کھڑے ہو کر لائسنس بنوا رہے ہیں۔" انہوں نے وزیراعلیٰ پنجاب مریم نواز کا خصوصی شکریہ ادا کیا اور کہا کہ عوام کیلئے بہترین اقدام کیا گیا ہے، جبکہ اس کا کریڈٹ پنجاب پولیس اور ٹریفک پولیس کو بھی جاتا ہے۔ وارث بیگ نے بتایا کہ ان کا اپنا چالان بھی ہوا جسے انہوں نے خوشی سے ادا کیا اور شہریوں کو پیغام دیا کہ قانون کی پابندی کریں، لین کی خلاف ورزی اور غلط اوور ٹیکنگ سے گریز کریں، کیونکہ حادثات انہی غلطیوں کی وجہ سے ہوتے ہیں۔