سموگ تدارک کیس، پولیس کی گاڑیوں سمیت تمام ہیوی گاڑیوں کی چیکنگ کا حکم

12-10-2025

(محمد اشفاق) لاہور ہائیکورٹ نے سموگ کے تدارک کیلئے دائر درخواستوں پر گزشتہ سماعت کا تحریری حکم جاری کر دیا۔

جسٹس شاہد کریم کی جانب سے جاری کئے گئے فیصلے میں مختلف اداروں کو سموگ کنٹرول کے حوالے سے واضح ہدایات جاری کی گئی ہیں۔ تحریری فیصلے کے مطابق عدالت نے پولیس سمیت تمام متعلقہ اداروں کو ہدایات دی ہیں کہ شہر بھر میں ہیوی گاڑیوں کی سخت چیکنگ کی جائے تاکہ دھوئیں کے اخراج کو مؤثر طریقے سے روکا جا سکے۔ عدالت نے محکمہ ماحولیات کو گاڑیوں کی فٹنس سے متعلق مکمل رپورٹ پیش کرنے کا حکم دیا ہے، جبکہ شوگر ملز میں ٹریٹمنٹ پلانٹس کی اپ ڈیٹ سے متعلق معلومات بھی رپورٹ میں شامل کرنے کی ہدایت کی گئی ہے، واسا کو بھی ہدایت کی گئی کہ پانی کے چارجز کے اجرا کیلئے متعلقہ رولز کے تحت نوٹسز جاری کئے جائیں۔ عدالت نے واضح کیا کہ ناصر باغ میں جاری تعمیراتی کام کے دوران کوئی درخت نہیں کاٹا جائے گا، ناصر باغ سے 123 درخت ٹرانسپلانٹ کئے گئے ہیں اور پی ایچ اے کے مطابق یہ درخت محفوظ ہیں اور ان کی باقاعدہ دیکھ بھال کی جا رہی ہے، درختوں کی شناخت کیلئے ان پر نمبرز بھی لگا دیئے گئے ہیں، عدالت نے پی ایچ اے کو درختوں کی منتقلی سے متعلق جامع پالیسی وضع کرنے کی ہدایت بھی کر دی۔ دورانِ سماعت ممبر جوڈیشل واٹر کمیشن  نے آگاہ کیا کہ سی ٹی او آفس میں جامع ٹریفک پلان تیار کرنے کیلئے ایک اہم میٹنگ منعقد ہوئی ہے، عدالت نے ہدایت کی کہ سی ٹی او آفس لاہور ٹرانسپورٹ کمپنی کے نمائندوں کے ساتھ مکمل ہم آہنگی قائم کرے تاکہ ٹریفک کے بہاؤ اور آلودگی کے مسائل کو حل کیا جا سکے۔ عدالت نے ای پی اے کے وکیل سے سموگ کی صورتحال اور اقدامات سے متعلق تفصیلی رپورٹ طلب کرتے ہوئے مزید سماعت 12 دسمبر تک ملتوی کر دی۔