سی ٹی ڈی پنجاب کی کارروائی، بھارتی خفیہ ایجنسی ’’را‘‘ کے 12 دہشت گرد گرفتار

12-08-2025

(لاہور نیوز) سی ٹی ڈی پنجاب نے بڑی کارروائی کرتے ہوئے بھارتی خفیہ ایجنسی را کے 12 دہشت گردوں کو بھاری مقدار میں اسلحہ سمیت گرفتار کر لیا۔

سی ٹی ڈی پنجاب کے مطابق گرفتار ملزمان کے قبضے سے حساس مقامات اور حساس اداروں کی تصاویر، ویڈیوز اور لوکیشنز بھی برآمد کی گئی ہیں، تفتیشی ذرائع کے مطابق ملزمان کے موبائل فونز سے ایک مدرسے اور ایک میلے کی تصاویر اور ویڈیو مواد بھی ملا ہے، جسے ممکنہ ٹارگٹ سمجھا جا رہا ہے۔ حکام کا کہنا ہے کہ فیصل آباد سے گرفتار دہشت گرد پنجاب میں خوف و ہراس پھیلانے اور مذہبی منافرت کو ہوا دینے کی منصوبہ بندی کر رہے تھے، لاہور سے گرفتار ملزمان میں دیپ سنگھ، عظمت، فیضان، نبیل ابرار اور عثمان سرفراز شامل ہیں، جبکہ فیصل آباد سے دانش کو حراست میں لیا گیا، اسی طرح بہاولپور سے ’’فتنہ الہندوستان‘‘ نامی گروہ سے تعلق رکھنے والے رجب، ہاشم، ثاقب اور عارف گرفتار کئے گئے۔ سی ٹی ڈی  نے انکشاف کیا ہے کہ ملزمان کی گرفتاری میں عادل نامی فیس بک آئی ڈی کا اہم کردار سامنے آیا، جو مبینہ طور پر بھارت میں بیٹھ کر را کے تعاون سے آپریٹ کی جا رہی تھی، اسی رابطے کے ذریعے دہشت گردوں کو فنڈنگ اور ہدایات فراہم کی جاتی تھیں۔ سی ٹی ڈی کے مطابق گرفتار ملزمان کے خلاف مقدمات درج کر لئے گئے ہیں اور مزید تفتیش جاری ہے، کارروائی کے دوران ملزمان کے قبضے سے 7 آئی ای ڈی بم، 2 ڈیٹونیٹر، 102 فٹ حفاظتی فیوز وائر، موبائل فون، نقدی اور دیگر اسلحہ بھی برآمد کیا گیا ہے۔