بانی نے کہا خیبرپختونخوا میں گورنر راج لگائیں پھر دیکھیں کیا ہوتا ہے: علیمہ خان

12-05-2025

(لاہور نیوز) بانی پاکستان تحریک انصاف (پی ٹی آئی) کی ہمشیرہ علیمہ خان نے کہا ہے کہ بانی نے کہا ہے خیبرپختونخوا میں گورنر راج لگائیں پھر دیکھیں کیا ہوتا ہے۔

اے ٹی سی کے باہر میڈیا سے گفتگو کرتے ہوئے علیمہ خان کا کہنا تھا کہ بانی پی ٹی آئی کو قید تنہائی میں رکھا ہوا ہے، بانی کو اب ٹارچر کیا جا رہا ہے، عمران خان عوام کی آواز ہے، عوام کی آواز کو بند کرنا چاہ رہے ہیں۔ انہوں نے کہا کہ بانی نے کہا ہے میں فرعونیت کے آگے نہیں جھکوں گا، ہم بھی نہیں جھکیں گے، بہن نورین نیازی پر تشدد کیا گیا، عظمیٰ رانی کو ایس ایچ او گلناز نے کہا ان کو گھیسٹ کر پولیس وین میں پھینکو، بانی نے مثال قائم کر دی کہ صرف اللہ سے ہی ڈرنا ہے۔ ان کا کہنا تھا کہ ہم بھی آرام سے گھر بیٹھ سکتے ہیں، ہمارا بھائی پاکستان کے مستقبل کیلئے کھڑا ہے، نصیحت کرتے ہیں وقت آگیا اب عوام بھی کھڑے ہوجائیں۔ علیمہ خان نے بتایا کہ بانی نے کہا ہے خیبرپختونخوا میں گورنر راج لگائیں پھر دیکھیں کیا ہوتا ہے، سارا خیبرپختونخوا پی ٹی آئی کے ساتھ کھڑا ہے، حکومت ختم کرنے کا مقصد ہے عوام کے نمائندوں کو ہٹا کر اپنا بندہ لگانا ڈکٹیٹر شپ ہوتی ہے، آپ ڈکٹیٹر شپ لاتے ہیں تو انتشار پھیلے گا، یہ چاہ رہے ہیں انتشار پھیلے۔ انہوں نے کہا کہ یہ طے شدہ ہے منگل کے روز بانی سے 6 لوگوں کی ملاقات ہوگی، میں قانون والی بات کر رہی ہوں، یہ کس قانون کے تحت کہہ رہے بانی سے ملاقات نہیں ہوگی، کیا قانون پر عمل کرنا ہماری ذمہ داری ہے، ہم ان کی دھمکیوں سے نہیں ڈرتے۔ بانی پی ٹی آئی کی ہمشیرہ کا مزید کہنا تھا کہ یہ خود اتنے پروٹوکول میں پھرتے ہیں، آئیں ہماری طرح آ کر اکیلے بیٹھیں، یہ جو ہم سے نمٹنے کی باتیں کر رہے، ذاتی طور پر ہم سے نمٹیں، یہ چوری شدہ مینڈیٹ پر بیٹھ کر ہمیں بتا رہے ہیں کہ ہم بھائی سے نہیں مل سکتے۔ پی ٹی آئی رہنماؤں کی عبوری ضمانتوں میں توسیع انسداد دہشت گردی عدالت لاہور نے 9 مئی جلاؤ گھیراؤ کے مقدمات میں بانی پی ٹی آئی عمران خان کی بہن علیمہ خان اور عظمیٰ خان، اسد عمر سمیت دیگر کی عبوری ضمانتوں میں توسیع کر دی۔ اے ٹی سی کے جج ارشد جاوید نے کیسز کی سماعت کی، علیمہ خان، عظمیٰ خان، اسد عمر، مسرت چیمہ، مسز مزمل مسعود بھٹی سمیت دیگر عدالت کے روبرو پیش ہوئے، پراسکیوشن نے مقدمات کا ریکارڈ عدالت پیش کر دیا، عدالت نے فواد چودھری کی ایک روزہ حاضری معافی کی درخواست منظور کر لی۔ عدالت نے آئندہ سماعت پر وکلاء سے دلائل طلب کر لئے اور ملزمان کی عبوری ضمانت کی درخواستوں میں 16 جنوری تک توسیع کر دی۔ یاد رہے کہ ملزمان پر مسلم لیگ (ن) کا آفس جلانے، کلمہ چوک کنٹینر جلانے کے مقدمات درج ہیں۔