دودھ فراڈ مافیا کے خلاف کارروائیاں، 3 ہزار 600 لٹر جعلی دودھ ضائع

12-05-2025

(ویب ڈیسک) لاہور میں دودھ فراڈ مافیا کے خلاف پنجاب فوڈ اتھارٹی کی کارروائیاں مزید سخت ہو گئیں۔

علی الصبح ٹھوکر نیاز بیگ میں کئے گئے کریک ڈاؤن کے دوران 3 ہزار 600 لٹر جعلی دودھ تلف کر دیا گیا جبکہ سپلائر ٹینکر، پلنجر، موٹر اور پائپ کو موقع پر ہی ضبط کر لیا گیا۔ ڈی جی فوڈ اتھارٹی عاصم جاوید کے مطابق جعلی دودھ شہر میں سپلائی کیلئے لایا جا رہا تھا، جسے چیکنگ کے دوران روک کر نمونے حاصل کئے گئے، لیبارٹری ٹیسٹ میں دودھ کا سیمپل مقررہ معیار پر پورا نہیں اترا اور اس میں پاؤڈر، گھی، پانی اور ممنوعہ کیمیکل اجزا کی ملاوٹ ثابت ہوئی۔ ترجمان فوڈ اتھارٹی کے مطابق جعلسازی میں ملوث ملک سپلائر کے خلاف مقدمہ درج کر لیا گیا، جبکہ ضبط شدہ سامان مزید قانونی کارروائی کیلئے تحویل میں لے لیا گیا ہے۔ ڈی جی فوڈ اتھارٹی عاصم جاوید نے کہا کہ ڈیری فارم سے صارف تک پہنچنے والے دودھ کی سخت چیکنگ کو یقینی بنایا جا رہا ہے، دودھ کے نام پر جعلی سفید محلول تیار اور فروخت کرنے والوں کی پنجاب میں کوئی جگہ نہیں۔ عاصم جاوید نے شہریوں سے اپیل کی کہ خوراک کے معیار سے متعلق کسی بھی شکایت کی صورت میں فوراً 1223 ہیلپ لائن پر اطلاع دیں تاکہ فوری کارروائی کو یقینی بنایا جا سکے۔