پاکستان اور ایران کا ریلوے و تجارتی روابط مزید مضبوط بنانے پر اتفاق

12-04-2025

(لاہورنیوز) پاکستان اور ایران کے درمیان ریلوے و تجارتی روابط مزید مضبوط بنانے پر اتفاق ہوا ہے۔

وزیرِ ریلوے محمد حنیف عباسی سے پاکستان میں ایرانی سفیر ڈاکٹر رضا امیری مقدم نے ملاقات کی، جس میں ایرانی کمرشل کونسلر کمالی مقدم بھی شریک تھیں، ملاقات کے دوران پاکستان اور ایران کے دوطرفہ تعلقات مزید مضبوط بنانے کے امور پر تبادلہ خیال ہوا، جبکہ دونوں ممالک کے مابین مثبت تعاون اور حمایت پر اظہارِ تشکر کیا گیا۔ فریقین نے اس سال استنبول–تہران–اسلام آباد (آئی ٹی آئی) ٹرین دوبارہ بحال کرنے پر اتفاق کیا، اس موقع پر پاکستان اور ایران کے درمیان تجارت میں اضافے اور باہمی درآمدات و برآمدات بڑھانے پر زور دیا گیا۔وزیرِ ریلوے محمد حنیف عباسی نے کہا کہ تجارت میں اضافہ ریلوے ریونیو اور ملکی معیشت کے لئے مفید ہوگا، وزیرِ اعظم کے وژن کے مطابق علاقائی روابط کا فروغ اور خطے کو ریلوے کے ذریعے جوڑنا ہماری اولین ترجیح ہے۔ ملاقات میں ایرانی سفیر نے وزیرِ ریلوے کو ایران کے سرکاری دورے کی دعوت بھی دی۔ وزیر ریلوے محمد حنیف عباسی نے کہا کہ ایران میں زیارات کی سعادت حاصل کرنا ان کے لئے باعثِ شرف ہوگا، جبکہ ایرانی ریلوے نظام کا جائزہ لینا بھی دورے کے ایجنڈے میں شامل ہوگا۔