پاک سری لنکا سیریز: بی بی ایل لیگ کھیلنے والے کرکٹرز کو واپس آنا ہو گا

12-04-2025

(لاہور نیوز) آسٹریلیا میں بگ بیش لیگ کھیلنے والے قومی کرکٹرز کو سری لنکا کے خلاف ٹی 20 سیریز کیلئے ٹیم میں منتخب ہونے کی صورت میں لیگ چھوڑنا پڑے گی۔

ذرائع کا بتانا ہے کہ قومی کرکٹرز کو غیر ملکی لیگز کیلئے مشروط این او سی جاری کئے جاتے ہیں، قومی ڈیوٹی کیلئے کھلاڑیوں کو خود کو دستیاب رکھنا پڑتا ہے۔ بی بی ایل کیلئے قومی کرکٹرز کو 14 دسمبر سے 28 جنوری تک این او سی جاری کئے گئے ہیں، بابر اعظم، محمد رضوان، شاہین آفریدی، حارث رؤف، شاداب خان اور حسن علی کو این او سی جاری ہوئے ہیں۔ اِس دوران پاکستان ٹی 20 ٹیم کو تین میچز کی سیریز کیلئے سری لنکا کا دورہ کرنا ہے، ٹی 20 میچز 7، 9 اور 11 جنوری کو دمبولا میں کھیلے جائیں گے، یہ سیریز ٹی 20 ورلڈکپ 2026 کی تیاریوں کے سلسلے میں رکھی گئی ہے۔ ذرائع کے مطابق قومی کرکٹرز ٹیم میں منتخب ہونے کی صورت میں آسٹریلیا سے سری لنکا جائیں گے تاہم اس بات کا امکان کم ہے کہ ٹی 20 سکواڈ کے مستقل کھلاڑیوں کو سری لنکا سیریز سے استثنیٰ دیا جائے۔