آئندہ سال میٹرک امتحانات کیلئے کتابوں کی قلت، طلبا و والدین پریشان

12-04-2025

(ویب ڈیسک) آئندہ سال میٹرک امتحانات دینے والے طلبا شدید پریشانی کا شکار ہیں کیونکہ فوڈ اینڈ نیوٹریشن اور تاریخِ پاکستان کی کتابوں کی مارکیٹ میں قلت کا سامنا ہے۔

ذرائع کے مطابق اگرچہ تعلیمی انتظامیہ نے دونوں مضامین کیلئے کورس آؤٹ لائن جاری کر دی ہے، تاہم کتابوں کی عدم دستیابی نے طلبا کی مشکلات میں اضافہ کر دیا ہے۔ طلبا اور والدین کا کہنا ہے کہ پورا سال گزر چکا ہے اور امتحانات میں صرف تین ماہ باقی ہیں، مگر دونوں مضامین کی کتابیں بازار میں دستیاب نہیں، جس سے سینکڑوں طلبا کا سال ضائع ہونے کا خدشہ پیدا ہو گیا ہے۔ والدین کا کہنا ہے کہ انگلش میڈیم طلبا کیلئے دونوں مضامین کی کتابیں بالکل دستیاب نہیں ہیں، جبکہ اردو میڈیم طلبا کو بھی اردو بازار سے پرانی کتابیں خریدنی پڑ رہی ہیں، یہ کتابیں 10 سال قبل پرنٹ کی گئی تھیں جس کے باعث مارکیٹ میں ان کی قلت پیدا ہو گئی ہے۔ والدین  نے پیکٹا سے فوری طور پر کتابوں کی نئی پرنٹنگ کا مطالبہ کیا ہے اور کہا ہے کہ طلبا کو باآسانی کتابوں تک رسائی فراہم کی جائے، کیونکہ صرف کورس آؤٹ لائن جاری کر دینا مسئلے کا حل نہیں۔ والدین اور طلبا کا کہنا ہے کہ انہیں امتحانات کی تیاری کیلئے ان کتابوں کی ضرورت ہے تاکہ وہ اپنے نصاب کو مکمل کر سکیں اور امتحان میں کامیابی حاصل کر سکیں۔