بجلی چوروں کے خلاف کریک ڈاؤن، 27 لاکھ یونٹس کی بجلی چوری پکڑی گئی

12-02-2025

(لاہور نیوز) لاہور الیکٹرک سپلائی کمپنی (لیسکو) نے نومبر 2025 کے دوران بجلی چوروں کے خلاف کی جانے والی کارروائیوں کے اعداد و شمار جاری کر دیئے۔

لیسکو کے مطابق ایک ماہ میں 27 لاکھ 89 ہزار 851 یونٹس کی بجلی چوری پکڑی گئی، جس سے قومی خزانے کو بھاری نقصان پہنچایا جا رہا تھا۔ یکم تا 30 نومبر 2025 کے دوران لیسکو  نے 3 ہزار 32 مقامات پر بجلی چوری کی نشاندہی کی، ان مقامات میں 3 ہزار 27 گھریلو، ایک کمرشل، ایک زرعی اور تین صنعتی صارفین شامل ہیں جو بجلی چوری کرتے پکڑے گئے۔ لیسکو  نے بجلی چوروں کے خلاف 2 ہزار 973 مقدمات کے اندراج کیلئے درخواستیں جمع کرائیں، اس کے علاوہ، نومبر میں بجلی چوروں سے 1 کروڑ 93 لاکھ 6 ہزار روپے کی ریکوری بھی کی گئی، یہ کارروائیاں لیسکو کی اینٹی تھیفٹ ٹیم اور ڈسکوز سپورٹ یونٹ کے مشترکہ تعاون سے کی گئیں۔ انجینئر محمد رمضان بٹ، چیف ایگزیکٹو لیسکو  نے کہا کہ بجلی چور قوم کے چور ہیں، ان سے کسی قسم کی رعایت نہیں برتی جائے گی، وزیراعظم کی زیرو ٹالرنس پالیسی کے تحت بجلی چوری پر سخت کارروائیاں اسی طرح جاری رہیں گی، اور ہم اس کے مکمل خاتمے تک اپنی کارروائیاں جاری رکھیں گے۔