ٹھوکر نیاز بیگ پر فوڈ اتھارٹی کا کریک ڈاؤن، 2 ہزار لٹر جعلی دودھ ضائع

12-02-2025

(لاہور نیوز) ٹھوکر نیاز بیگ پر فوڈ اتھارٹی نے کریک ڈاؤن کرتے ہوئے 2 ہزار لٹر جعلی دودھ تلف کر دیا۔

ڈی جی فوڈ اتھارٹی عاصم جاوید نے بتایا کہ سپلائر ٹینکر میں جعلی دودھ سپلائی کرنے کی کوشش کی جا رہی تھی، دودھ کے نام پر ایک سفید محلول تیار کیا گیا تھا جسے علی الصبح مختلف دکانوں پر سپلائی کیا جانا تھا۔ موقع سے پاؤڈر، کیمیکلز، ناقص گھی اور جعلی گاڑھا محلول برآمد کیا گیا، دودھ کے نمونوں کا فوری ٹیسٹ کیا گیا جو فیل ہو گئے جس کے بعد جعلی دودھ کو تلف کرنے کا فیصلہ کیا گیا، دودھ میں پانی، پاؤڈر اور ویجیٹیبل گھی کی ملاوٹ پائی گئی جو انسانی صحت کیلئے انتہائی مضر ثابت ہو سکتی ہے۔ ڈی جی فوڈ اتھارٹی نے شہریوں کو آگاہ کیا کہ جعلی دودھ میں استعمال ہونے والے اجزا انسانی صحت کیلئے خطرناک ہیں اور ان سے مختلف بیماریوں کا خطرہ ہو سکتا ہے۔ عاصم جاوید نے شہریوں سے گزارش کی کہ وہ اپنے اردگرد موجود جعلساز عناصر کی شکایت 1223 یا فوڈ اتھارٹی کے فیس بک پیج پر ان باکس کر کے درج کرائیں تاکہ اس قسم کی جعلسازی کے خلاف سخت کارروائیاں کی جا سکیں۔