پٹرولیم مصنوعات سستی ہونے پر گڈز ٹرانسپورٹرز کا کرایوں میں کمی کا اعلان

12-01-2025

(لاہور نیوز) پٹرولیم مصنوعات کی قیمتوں میں کمی کے بعد گڈز ٹرانسپورٹرز نے کرایوں میں 3 فیصد کمی کا اعلان کر دیا۔

پاکستان گڈز ٹرانسپورٹ الائنس کے صدر ملک شہزاد اعوان نے حکومتی فیصلے کا خیر مقدم کرتے ہوئے کہا کہ انہیں توقع ہے کہ آئندہ دنوں میں پٹرولیم مصنوعات کی قیمتوں میں مزید کمی ہو گی۔ ملک شہزاد اعوان  نے حکومت سے ود ہولڈنگ ٹیکس اور ٹول ٹیکس میں بھی کمی کا مطالبہ کیا ہے تاکہ ٹرانسپورٹ سیکٹر کو حقیقی اور مؤثر ریلیف فراہم کیا جا سکے۔ انہوں نے پنجاب حکومت کے نئے آرڈیننس پر تشویش کا اظہار کرتے ہوئے کہا کہ اس قانون کا غلط استعمال کیا جا رہا ہے اور اس کی آڑ میں ٹریفک پولیس اور وارڈن پولیس ٹرانسپورٹرز کے ساتھ زیادتیاں کر رہی ہے۔ گڈز ٹرانسپورٹ الائنس کے صدر  نے دعویٰ کیا کہ صوبے میں ٹرانسپورٹرز کی گاڑیوں پر بلاجواز ایف آئی آرز اور بھاری جرمانے عائد کئے جا رہے ہیں، جس کے باعث ٹرانسپورٹرز جلد ہی اپنی گاڑیاں بند کرنے پر مجبور ہو سکتے ہیں۔