دھواں چھوڑنے والی گاڑیوں کے خلاف کارروائیاں، 3067 گاڑیوں کے چالان

12-01-2025

(لاہور نیوز) صوبے میں سموگ اور ماحولیاتی آلودگی پر قابو پانے کیلئے ٹرانسپورٹ اینڈ ماس ٹرانزٹ ڈیپارٹمنٹ نے دھواں چھوڑنے والی گاڑیوں کے خلاف کارروائیاں مزید سخت کر دی ہیں۔

یکم تا 30 نومبر صوبے بھر خصوصاً لاہور میں بھرپور کریک ڈاؤن جاری رہا، محکمہ ٹرانسپورٹ کے مطابق لاہور میں 21788 گاڑیوں کا معائنہ کیا گیا، جن میں سے 3067 گاڑیوں کو دھواں چھوڑنے اور بغیر فٹنس سرٹیفکیٹ کے چلنے پر چالان کیا گیا، جبکہ 1831 گاڑیاں بند کر دی گئیں، گڈز ٹرانسپورٹ میں اوورلوڈنگ پر 2476 گاڑیوں کے چالان کئے گئے۔ کارروائیوں کے دوران مجموعی طور پر 3 کروڑ روپے کے جرمانے عائد کئے گئے، جبکہ 460 ایف آئی آرز درج اور 413 ڈرائیور گرفتار کئے گئے۔ ٹرانسپورٹ ڈیپارٹمنٹ کے مطابق نومبر کے دوران لاہور میں مجموعی طور پر 11 ہزار گاڑیوں کا فٹنس معائنہ کیا گیا، جن میں سے 7 ہزار گاڑیوں کو فٹنس سرٹیفکیٹ جاری کیا گیا۔ وزیر ٹرانسپورٹ اینڈ ماس ٹرانزٹ بلال اکبر خان  نے دھواں چھوڑتی اور ناقص حالت میں چلنے والی گاڑیوں کے خلاف کارروائی مزید سخت کرنے کے احکامات جاری کئے ہیں، انہوں نے کہا کہ انسانی صحت سے کھیلنے والے عناصر کیلئے اب کسی قسم کی رعایت نہیں برتی جائے گی۔ وزیر ٹرانسپورٹ نے شہریوں کو خبردار کرتے ہوئے کہا کہ گاڑی چلانی ہے تو اس کی مرمت کروا کر سڑکوں پر آئیے۔