تحریک انصاف کو پشاور اورخیبر پختونخوا جانے کا اعلان کرنا چاہیے: مریم اورنگزیب

11-30-2025

(لاہور نیوز) پنجاب کی سینئر صوبائی وزیر مریم اورنگزیب نے کہا ہے کہ تحریک انصاف کو پشاور اور خیبر پختونخوا جانے کا اعلان کرنا چاہیے، وہاں کے لوگ اپنے وزیراعلیٰ کے منتظر ہیں۔

سینئر صوبائی وزیر مریم اورنگزیب نے اپنے ایک بیان میں کہا کہ خیبر پختونخوا کے کھنڈر ہسپتال اور سکول وزیراعلیٰ خیبر پختونخوا کے انتظار میں ہیں، خیبر پختونخوا کی ٹوٹی ہوئی سڑکیں اور بسیں وزیراعلیٰ کے منتظر ہیں۔ مریم اورنگزیب نے کہا کہ خیبر پختونخوا کے طالب علم سکالر شپ پروگرام اور لیپ ٹاپ کے منتظر ہیں، خیبر پختونخوا کی سڑکوں ، گلیوں اور بازاروں میں  پڑا ہوا کوڑا اور گند وزیراعلیٰ خیبر پختونخوا کے انتظار میں ہے۔ انہوں نے مزید کہا کہ وزیراعلیٰ کی کرسی تماشہ اور مذاق بن چکی ہے، 23 نومبر کو خیبر پختونخوا کے لوگوں نے مسلم لیگ ن کے حق میں فیصلہ دیا، فیملی ری یونین زمان پارک میں کر لیا کریں، عوام کو تکلیف نہ دیں۔