ریلوے میں بجلی بلوں میں کروڑوں روپے کی بوگس ادائیگیوں کا انکشاف

11-29-2025

(لاہور نیوز) ریلوے میں بجلی کے بلوں کی مد میں کروڑوں روپے کی بوگس ادائیگیوں کا انکشاف ہوا ہے۔

حالیہ انکوائری رپورٹ میں 11 کروڑ روپے سے زائد کی مشکوک ادائیگیوں کی نشاندہی کی گئی ہے۔ رپورٹ کے مطابق تین رہائشی کالونیوں کے بجلی اور بلنگ کے مکمل انتظام کا کام 2023 میں لیسکو کو سونپا گیا تھا، معاہدے کے تحت تمام رہائشیوں کے بجلی کے میٹرز لیسکو  نے نصب کئے اور بلنگ کا عمل بھی وہی انجام دے رہی ہے۔ تاہم رپورٹ میں کہا گیا ہے کہ علیحدہ علیحدہ بلنگ کے باوجود لیسکو  نے اجتماعی طور پر بلز ریلوے کو بھی بھجوائے ، جس کی بنیاد پر غیر حقیقی ادائیگیوں کا پتہ چلا ہے۔ انکوائری ٹیم  نے مشورہ دیا ہے کہ اس معاملے کی مزید تفصیلی تحقیقات کی جائیں تاکہ مالی بدعنوانیوں کو روکا جا سکے اور ذمہ دار افسران کے خلاف قانونی کارروائی عمل میں لائی جائے۔