پنجاب سیف سٹیز اتھارٹی کا بڑا قدم، موبائل کیمرہ کنٹرول روم سے منسلک ہو گا

11-29-2025

(لاہور نیوز) وزیراعلیٰ پنجاب کے محفوظ پنجاب ویژن کے تحت پنجاب سیف سٹیز اتھارٹی نے شہریوں کی حفاظت کیلئے ایک اہم اور جدید قدم اٹھایا ہے۔

 اب ہر شہری کا موبائل فون کیمرہ براہِ راست سیف سٹی کے نظام سے منسلک ہو سکے گا، جس سے سنگین نوعیت کے واقعات کی فوری نگرانی اور بروقت ایکشن ممکن ہو گا۔ اتھارٹی نے اپنی پبلک سیفٹی ایپ میں نیا فیچر "کنیکٹ ٹو پی ایس سی اے" شامل کیا ہے، اس فیچر کے ذریعے ایمرجنسی صورتحال میں شہری اپنا موبائل کیمرہ لائیو سیف سٹی کنٹرول روم سے منسلک کر سکیں گے۔ ایمرجنسی کے وقت جب شہری ہیلپ لائن 15 پر کال کرے گا تو سیف سٹی آفیسر شہری کو فوری لائیو فیڈ لنک بھیجے گا، لنک کھولتے ہی موبائل فون کا کیمرہ براہِ راست سیف سٹی کنٹرول روم سے کنیکٹ ہو جائے گا، اس لائیو ویڈیو کی مدد سے کنٹرول روم اہلکار موقعِ واردات کی اصل صورتحال فوری دیکھ کر مناسب امدادی کارروائی شروع کر سکیں گے۔ ترجمان سیف سٹی اتھارٹی نے واضح کیا ہے کہ یہ فیچر صرف ایمرجنسی کی صورتحال میں استعمال کیلئے ہے، شہریوں کو ہدایت کی گئی ہے کہ وہ موبائل کی لوکیشن آن رکھیں اور غیر ضروری ویڈیوز شیئر نہ کریں۔