پاکستان اور آسٹریلیا کے درمیان دو طرفہ سرمایہ کاری معاہدہ آخری مراحل میں داخل

11-28-2025

(لاہور نیوز) ایس آئی ایف سی کے تعاون سے پاکستان اور آسٹریلیا کے درمیان دو طرفہ سرمایہ کاری معاہدہ حتمی مراحل میں داخل ہو گیا۔

تفصیلات کے مطابق ایس آئی ایف سی کی بہترین سہولت کاری سے پاکستان میں سرمایہ کاروں کے اعتماد میں مسلسل اضافہ ہو رہا ہے، پاکستان اور آسٹریلیا کا نئے سرمایہ کاری معاہدے کو حتمی شکل دینے پر اتفاق ہو گیا جبکہ وفود نے مذاکراتی مسودے پر دستخط بھی کر دیئے ہیں۔ دونوں ممالک کے وفود  نے توانائی، ٹیکنالوجی اور معدنیات میں سرمایہ کاری بڑھانے کیلئے مؤثر اقدامات کا جائزہ لیا جبکہ معاہدے میں پاکستان اور آسٹریلیا  نے طویل المدتی اقتصادی تعاون بڑھانے کے عزم کا اعادہ بھی کیا۔ بورڈ آف انویسٹمنٹ کے وزیر قیصر احمد شیخ کا کہنا تھا کہ پاکستان میں سرمایہ کاری پالیسی اصلاحات کے ایک نئے دور میں داخل ہو رہی ہے، حکومت عالمی طریقہ کار سے ہم آہنگ جدید سرمایہ کاری ماحول کی فراہمی کیلئے پرعزم ہے۔