غیرقانونی سمیں فروخت کرنیوالی فرنچائزز کیخلاف کارروائیاں، متعدد گرفتار

11-28-2025

(ویب ڈیسک) پاکستان ٹیلی کمیونیکیشن اتھارٹی (پی ٹی اے) نے غیرقانونی سموں کی فروخت اور جعلی بائیومیٹرک طریقوں سے سم ایکٹیویشن کے خلاف کریک ڈاؤن کو مزید تیز کر دیا۔

پی ٹی اے کے مطابق لاہور زونل آفس نے نیشنل سائبر کرائم انویسٹی گیشن ایجنسی کے ساتھ مل کر مشترکہ کارروائیاں کیں، ملک کے مختلف علاقوں میں کئی فرنچائزز پر چھاپے مارے گئے، جس کے نتیجے میں متعدد افراد کو گرفتار کیا گیا۔ پی ٹی اے حکام کا کہنا تھا کہ ان کارروائیوں کا آغاز اس وقت ہوا جب صارفین کی جانب سے سیلز چینل کے ذریعے جعلی طریقوں سے سم ایکٹیویشن کی شکایات درج کرائی گئیں۔ چھاپوں کے دوران بڑی تعداد میں مشکوک سمیں، بائیومیٹرک سکینرز اور وہ سامان برآمد کیا گیا جو بائیومیٹرک سسٹم کو بائی پاس کرنے کیلئے استعمال ہوتا تھا، برآمد ہونے والا سامان نیشنل سائبر کرائم انویسٹی گیشن ایجنسی نے اپنی تحویل میں لے لیا۔ پی ٹی اے کی جانب سے عوام کو خبردار کیا گیا ہے کہ وہ صرف مجاز فرنچائزز سے سم خریدیں اور بائیومیٹرک تصدیق کے عمل کی مکمل پیروی کریں تاکہ کسی بھی ناخوشگوار صورتحال سے بچا جا سکے۔