عمران خان کے انتقال کی افواہوں پر مشی خان آبدیدہ

11-27-2025

(ویب ڈیسک) عمران خان کے انتقال کی افواہوں پر مشی خان آبدیدہ ہو گئیں۔

گزشتہ روز سوشل میڈیا پر پاکستان تحریکِ انصاف کے بانی اور سابق وزیراعظم عمران خان کے انتقال سے متعلق بے بنیاد افواہیں تیزی سے پھیل گئیں جنہیں بھارتی اور افغان میڈیا کے بعض حلقوں نے بھی نشر کیا، ان غلط دعوؤں کے بعد پی ٹی آئی کے حامی صارفین نے عمران خان کی صحت کے بارے میں سرکاری معلومات فراہم کرنے کا مطالبہ بھی کیا۔ اداکارہ اور میزبان مشی خان نے بھی انسٹاگرام پر روتے ہوئے ایک ویڈیو جاری کی جس میں انہوں نے کہا کہ عمران خان کے حوالے سے تشویشناک اطلاعات گردش کر رہی ہیں، اداکارہ نے آرمی چیف، وزیراعظم شہباز شریف اور متعلقہ اداروں سے اپیل کی کہ عمران خان کی صحت کے بارے میں عوام کو باقاعدہ طور پر آگاہ کیا جائے۔ اڈیالہ جیل انتظامیہ نے عمران خان کی صحت سے متعلق تمام افواہوں کی سختی سے تردید کرتے ہوئے واضح کیا کہ وہ بالکل ٹھیک ہیں اور ان کی طبی حالت میں کسی قسم کا کوئی مسئلہ نہیں۔ حکام کے مطابق عمران خان کی باقاعدگی سے طبی نگرانی کی جا رہی ہے اور انہیں تمام ضروری سہولیات فراہم کی جا رہی ہیں جبکہ جیل انتظامیہ نے بھی سوشل میڈیا پر پھیلنے والی قیاس آرائیوں کو حقائق کے منافی قرار دے دیا۔ دوسری جانب توشہ خانہ ٹو کیس کی کل مقرر کی گئی جیل ٹرائل کی کارروائی منسوخ کر دی گئی ہےجبکہ کیس کی نئی تاریخ کی اطلاع جمعرات کو جوڈیشل کمپلیکس میں فراہم کی جائے گی۔ پی ٹی آئی کی جانب سے یہ بھی کہا جا رہا ہے کہ گزشتہ 25 دن سے عمران خان کی اپنی بہنوں اور وکلا سے ملاقات نہیں کرائی جا رہی جس کے باعث ان کی خیریت سے متعلق خدشات میں اضافہ ہو رہا ہے۔