جیل کمپلیکس بنانے کا منصوبہ، 90 ایکڑ زمین محکمہ جیل خانہ جات کے نام منتقل

11-24-2025

(لاہور نیوز) جدید جیل کمپلیکس کے قیام کا منصوبہ عملی شکل اختیار کرنے لگا ہے۔

کوٹ لکھپت کے قریب 90 ایکڑ زمین محکمہ جیل خانہ جات کو باضابطہ طور پر الاٹ کر دی گئی جہاں ایک بڑے اور جدید طرز کے جیل کیمپس کی تعمیر کی جائے گی، پنجاب حکومت نے جیل کی تعمیر کیلئے ایک ارب روپے کے فنڈز بھی جاری کر دیئے ہیں۔ منصوبے کے مطابق نئے جیل کمپلیکس میں 10 ہزار قیدیوں کو رکھنے کی گنجائش ہو گی، اس وقت لاہور میں موجود دونوں بڑی جیلیں، یعنی کوٹ لکھپت جیل اور کیمپ جیل، مجموعی طور پر صرف 4 ہزار قیدیوں کی گنجائش رکھتی ہیں، لیکن ان جیلوں میں 12 ہزار قیدی بند ہیں، جو سنگین گنجانیت کا باعث بنے ہوئے ہیں۔ آئی جی جیل خانہ جات میاں فاروق نذیر  نے بتایا کہ لاہور کی جیلوں میں شدید گنجان آبادی کے مسائل کو حل کرنے کیلئے یہ کمپلیکس انتہائی ضروری ہے، نئے جیل کمپلیکس پر جلد تعمیراتی کام شروع کروایا جائے گا تاکہ قیدیوں کو بہتر اور معیاری سہولتیں فراہم کی جا سکیں۔