طلحہ انجم کے بھارتی پرچم لہرانے کا معاملہ،فرحان سعید کا حیران کن ردعمل سامنے آگیا

11-21-2025

(ویب ڈیسک)پاکستانی ریپر طلحہ انجم کے بیرون ملک کنسرٹ کے دوران بھارتی پرچم لہرانے پر گلوکار فرحان سعید نے حیران کن ردعمل دے دیا۔

پاکستانی ریپر طلحہ انجم کے حالیہ کنسرٹ میں بھارتی پرچم لہرانے کے واقعے پر پیدا ہونے والی بحث ایک بار پھر شدت اختیار کر گئی ہے۔ اگرچہ طلحہ انجم نے بعدازاں اپنے اس رویے پر معافی مانگ لی ہے، تاہم گلوکار فرحان سعید کی جانب سے اس عمل کی حمایت پر سوشل میڈیا صارفین کی ناراضی میں اضافہ ہوگیا ہے۔ فرحان سعید نے حال ہی میں ایک انٹرویو میں طلحہ انجم کے اقدام کو درست قرار دیتے ہوئے کہا کہ اس پیغامِ محبت کو مثبت طور پر لیا جانا چاہیے۔ لیکن اس نے بولڈ موو کی جس کی وہ قیمت چکائے گا۔ ان کا کہنا تھا کہ میرے خیال میں طلحہ انجم نے بھارتی جھنڈا لہرا کر بہت اچھا کیا ہے، ہماری طرف سے یہی پیغام جانا چاہیے کہ ہم لوگوں کا ظرف بہت بڑا ہے۔ ان کا کہنا تھا کہ مجھے پاکستانیوں سے نہیں بھارتیوں سے شکایت ہے۔ میں نے بھارت میں بہت وقت گزارا ہے، میں جن انڈینز کو جانتا تھا وہ اور لوگ تھے جو بہت محبت کرتے تھے اب پتہ نہیں کیا ہو گیا ہے۔ فرحان سعید کا کہنا تھا کہ طلحہ انجم نے بہت اچھا کیا، کانسرٹ میں اس طرح ہو جاتا ہے لیکن اگر آپ کوئی بولڈ قدم اٹھاتے ہیں تو اس کے دونوں پہلو سامنے آتے ہیں جیسے میں اس کی تعریف کر رہا ہوں ویسے لوگ یہ بھی کہیں گے انڈینز ہمیں اتنا برا بھلا بولتے ہیں، ان کے اسٹارز کبھی یہ نہیں کریں گے تو یہ ان کا ظرف ہے۔ انہوں نے مزید کہا کہ ہم عزت اور پیار کرنے والے لوگ ہیں اس لیے ایسا کرتے ہیں ورنہ اب بالی ووڈ کوئی نہیں دیکھتا۔ فرحان سعید کے اس بیان پر سوشل میڈیا صارفین نے سخت ناراضی کا اظہار کیا۔ کئی صارفین نے ان کے مؤقف کو ’نامناسب‘ اور ’پاکستان مخالف‘ قرار دیتے ہوئے ان پر تنقید کی۔ سوشل میڈیا پر مختلف تبصرے سامنے آئے جن میں انہیں اپنے بیان پر نظرِ ثانی کرنے کا مشورہ بھی دیا گیا۔