مریم نواز کی فلپائنی سرمایہ کاروں کو سرمایہ کاری کی پیشکش، سہولیات فراہمی کی یقین دہانی

11-21-2025

(لاہور نیوز) وزیراعلیٰ پنجاب مریم نواز شریف سے فلپائن کے سفیر ڈاکٹر ایمینوئیل آر فرنینڈز کی ملاقات، دوطرفہ تعلقات، سرمایہ کاری، موسمیاتی تبدیلی، دفاعی تعاون اور عوامی روابط پر تفصیلی تبادلہ خیال کیا گیا۔

ملاقات میں سیاسی، آئینی اور پارلیمانی تعاون پر بھی گفتگو ہوئی۔ ملاقات میں فلپائن اور پنجاب کے مابین اشتراک کار مزید مضبوط بنانے پر اتفاق کیا گیا۔ وزیر اعلیٰ مریم نواز شریف نے فلپائن کو 2026 کی آسیان چیئرمین شپ کے لیے دلی مبارکباد دی۔ انہوں نے فلپائنی سرمایہ کاروں کو پنجاب میں سرمایہ کاری کی پیش کش کرتے ہوئے مکمل تعاون اور سہولیات کی یقین دہانی کرائی۔ مریم نواز نے گفتگو کرتے ہوئے کہا کہ پاکستان اور فلپائن کے درمیان دوستی 76 برسوں پر محیط ایک مضبوط اور باوقار رشتہ ہے، لاہور اور پنجاب کی سرزمین اپنے دروازے ہمیشہ دوست ممالک کے لیے کھلے رکھتی ہے، پاکستان اور فلپائن کے درمیان روحانی و تہذیبی اقدار، امن، انسانیت اور ہم آہنگی ہمارا مشترکہ ورثہ ہیں۔ وزیراعلیٰ نے کہا کہ  پاکستان اور فلپائن کے مابین 25 ایم او یوز اور  2022 کا دفاعی تعاون کا معاہدہ تعلقات کو ایک نئی جہت دے رہا ہے۔ مریم نواز نے فلپائن میں حالیہ زلزلوں اور طوفان سے انسانی جانوں کے ضیاع پر تعزیت کا اظہار کرتے ہوئے کہا کہ پاکستان دکھ کی اس گھڑی میں فلپائن کے عوام کے ساتھ کھڑا ہے،فلڈز اور ٹائفونز نے پاکستان اور فلپائن دونوں کو یکساں طور پر متاثر کیا ہے،لوس اینڈ ڈیمج فنڈ کی تشکیل میں پاکستان اور فلپائن کا کردار قابلِ فخر ہے، فلپائن کی ڈیزاسٹر مینجمنٹ مہارت سے پنجاب ادارہ جاتی تبادلوں کے ذریعے استفادہ کرنا چاہتا ہے۔ وزیر اعلیٰ نے مزید کہا کہ پاکستان پائیدار امن اور ڈی ریڈیکلائزیشن کے اقدامات کی مکمل حمایت کرتا ہے، پنجاب پاکستان کی معاشی ریڑھ کی ہڈی ہے،60 فیصد قومی جی ڈی پی اسی صوبے سے بنتی ہے، پنجاب میں آئی ٹی،توانائی،زرعت،فوڈ پروسیسنگ، فارماسیوٹیکل، آٹو پارٹس،لاجسٹکس اور کنسٹرکشن سیکٹر میں وسیع مواقع موجود ہیں۔ انہوں نے کہا کہ ایس آئی ایف سی اور پی بی آئی ٹی سرمایہ کاروں کو ون ونڈو سہولت اور پالیسی استحکام فراہم کر رہے ہیں ، پنجاب کے سپیشل اکنامک زونز میں عالمی معیار کا انفراسٹرکچر، ٹیکس مراعات اور کسٹمز سہولتیں میسر ہیں۔  مریم نواز نے کہا کہ پاکستان دفاعی تربیت، جوائنٹ مشقوں، انسدادِ دہشت گردی اور انٹیلیجنس شیئرنگ کے شعبوں میں مزید تعاون بڑھانے کے لیے تیار ہے، ہزاروں فلپائنی پاکستان میں اور بڑی تعداد میں پاکستانی فلپائن میں رہتے ہیں جو باہمی دوستی کو مضبوط بناتے ہیں، لاہور کا یونیسکو کرییٹیو سٹی اور ای سی او ٹورازم کیپیٹل 2027 کا اعزاز  ثقافتی،سیاحتی تعاون کے نئے دروازے کھولے گا۔