پی ٹی اے نے موبائل فونز پر ٹیکس کم کرنے کا مطالبہ کر دیا

11-21-2025

(ویب ڈیسک) پاکستان ٹیلی کمیونیکیشن اتھارٹی نے بیرونِ ملک سے آنے والے موبائل فونز پر لگنے والے بھاری ٹیکسوں میں کمی کی حمایت کر دی۔

پی ٹی اے کے ڈائریکٹر جنرل لائسنسنگ نے کہا کہ زیادہ ٹیکسوں  نے نہ صرف شہریوں کو متاثر کیا ہے بلکہ انڈسٹری کے تمام سٹیک ہولڈرز کے لئے بھی مشکلات پیدا کی ہیں۔ انہوں  نے وضاحت کی کہ موبائل فونز پر ٹیکس لگانے یا وصول کرنے کا اختیار پی ٹی اے کے پاس نہیں ہے، بلکہ یہ مکمل طور پر فیڈرل بورڈ آف ریونیو کی ذمہ داری ہے۔ انہوں نے کہا کہ اکثر لوگ غلط فہمی میں پی ٹی اے کو ٹیکس کا ذمہ دار سمجھتے ہیں، حالانکہ حقیقت یہ ہے کہ یہ ٹیکس ایف بی آر کے ذریعے وصول کئے جاتے ہیں۔ ڈی جی لائسنسنگ نے مزید بتایا کہ پی ٹی اے کے افسران بھی عام شہریوں کی طرح موبائل فون خریدتے ہیں اور انہیں بھی تمام ٹیکس ادا کرنا پڑتا ہے، پی ٹی اے کے افسران کو نہ تو کسی قسم کی چھوٹ دی جاتی ہے اور نہ ہی مفت موبائل فونز فراہم کئے جاتے ہیں۔ دوسری جانب عام شہریوں کے ساتھ ساتھ بیرونِ ملک رہنے والے پاکستانی بھی طویل عرصے سے شکایت کر رہے ہیں کہ بھاری ٹیکسوں کے باعث بیرونِ ملک سے لائے گئے موبائل فونز کو پاکستان میں رجسٹر کرانا نہ صرف مشکل بلکہ مہنگا بھی ہو گیا ہے، اس صورتحال کو بہتر بنانے کیلئے پی ٹی اے نے ٹیکسوں میں کمی کی حمایت کی ہے تاکہ عوام کو موبائل فونز کے استعمال میں سہولت مل سکے۔