سیاحتی مقامات پر پانی کے راستے میں کوئی ہوٹل نہیں بنے گا: مصدق ملک

11-21-2025

(ویب ڈیسک) وفاقی وزیر موسمیاتی تبدیلی مصدق ملک نے کہا ہے کہ وزیراعظم کے حکم پر سیاحتی مقامات پر پانی کے راستے میں کسی قسم کی ہوٹل یا تجارتی تعمیرات نہیں کی جائیں گی۔

مصدق ملک نے کہا کہ کسی بھی سیاحتی مقام پر پانی کے راستے میں ہوٹل بنانے کی اجازت نہیں ہو گی، یہ فیصلہ قدرتی ماحول کو بچانے اور ان سیاحتی مقامات کی خوبصورتی کو برقرار رکھنے کیلئے کیا گیا ہے۔ انہوں نے کہا کہ بدقسمتی سے موسمیاتی تبدیلی، صحت اور تعلیم جیسے اہم مسائل پر کم سوالات کئے جاتے ہیں، جبکہ ان موضوعات کو بھی سیاست کا حصہ سمجھنا چاہئے۔ مصدق ملک نے عالمی سطح پر موسمیاتی تبدیلی کے حوالے سے پائے جانے والی ناانصافیوں پر بھی بات کی، ان کے مطابق دنیا کے 3 ممالک 56 فیصد کاربن ایمیشنز پیدا کرتے ہیں لیکن وہ کوپ 30 جیسے عالمی فورمز پر نہیں آتے، جبکہ وہی ممالک گرین فائننسنگ حاصل کر رہے ہیں۔ انہوں نے مزید کہا کہ 10 ممالک دنیا کی 85 فیصد گرین فائننسنگ لے رہے ہیں، جبکہ باقی 80 فیصد ممالک کیلئے صرف 15 فیصد فنڈز مختص کئے گئے ہیں، یہ نا انصافی پاکستانی حکومت دنیا کے تمام فورمز پر اجاگر کرے گی۔