ڈاکٹر عافیہ صدیقی کیس، حکومت سے جواب داخل نہ کرنے کی وجوہات طلب

11-20-2025

(لاہور نیوز) ڈاکٹر عافیہ صدیقی کیس میں اہم پیشرفت، اسلام آباد ہائیکورٹ نے لارجر بنچ نے عافیہ صدیقی کیس میں عدالتی معاونت پر حکومت سے جواب داخل نہ کرنے کی وجوہات طلب کر لیں۔

اسلام آباد ہائی کورٹ کے لارجر بنچ نے عافیہ صدیقی کی بہن فوزیہ صدیقی کی درخواست پر سماعت کی۔ جسٹس ارباب محمد طاہر ، جسٹس خادم حسین، جسٹس محمد اعظم خان اور جسٹس راجہ انعام امین منہاس بنچ میں شامل تھے۔ عدالت نے حکم دیا کہ وفاقی حکومت تین دسمبر تک وجوہات جمع کروائے کہ عافیہ صدیقی کیس میں عدالتی معاونت کیوں نہیں کی گئی؟ درخواست گزار فوزیہ صدیقی اپنے وکیل عمران شفیق ایڈووکیٹ کے ساتھ عدالت میں پیش ہوئیں، سابق سینیٹر مشتاق احمد بھی دوران سماعت کمرہ عدالت میں موجود رہے، مذکورہ بالا حکم کے ساتھ ہی عدالت نے مزید سماعت 3 دسمبر تک ملتوی کر دی۔