پنجاب حکومت کا ہر قدم بچوں کی بھلائی، حفاظت اور خوشیوں کیلئے ہے: مریم نواز

11-20-2025

(لاہور نیوز) وزیراعلیٰ پنجاب مریم نواز شریف نے کہا ہے کہ پنجاب حکومت کا ہر قدم بچوں کی بھلائی، حفاظت اور خوشیوں کیلئے ہے۔

وزیراعلیٰ پنجاب مریم نواز شریف نے ورلڈ چِلڈرن ڈے کے موقع پر اپنے خصوصی پیغام میں کہا کہ میرے پاکستان کا ہر بچہ لخت جگر ہے، میری اولاد کی مانند میرا مستقبل، میری ذمہ داری اور اولین ترجیح ہے، پنجاب کے ہر بچے کو محبت، دعاؤں اور رحمتوں سے بھرپور سلام پیش کرتی ہوں۔ مریم نواز شریف نے اپنے پیغام میں کہا کہ جہاں بچے محفوظ ہوں وہاں مستقبل روشن ہوتا ہے، پنجاب حکومت کا ہر قدم بچوں کی بھلائی، حفاظت اور خوشیوں کے لئے ہے۔ وزیراعلیٰ پنجاب نے بچوں کی صحت اور تعلیم کو حکومت کی اولین ترجیح قرار دیا اور کہا کہ بچوں کی صحت اور اعلیٰ تعلیم ہماری پہلی ترجیح ہے، انہوں نے خاص طور پر چلڈرن ہارٹ سرجری پروگرام کا ذکر کیا جس کے ذریعے ہزاروں بچوں کی زندگیاں بچائی گئی ہیں۔ مریم نواز شریف نے مزید کہا کہ ٹائپ-ون شوگر کے مریض بچوں کو انسولین کِٹس گھر گھر پہنچا رہے ہیں اور آٹسٹک بچوں کیلئے پاکستان کا پہلا خصوصی آٹزم سکول قائم کر دیا ہے، جس کا جلد افتتاح ہو گا، ننھے بچوں کے لئے نواز شریف انسٹیٹیوٹ آف ارلی ایجوکیشن ہر ضلع میں قائم کئے جائیں گے۔ وزیراعلیٰ نے ورچوئل سینٹر فار چائلڈ سیفٹی پروگرام کا ذکر کرتے ہوئے کہا کہ یہ پروگرام بچوں کی گمشدگی، استحصال اور خطرات کے کیسز جدید ترین نظام کے تحت حل کر رہا ہے، چائلڈ لیبر کے انسداد کیلئے سخت کریک ڈاؤن جاری ہے اور بچوں کے خلاف تشدد اور جرائم کا خاتمہ یقینی بنایا جا رہا ہے، پنجاب میں بچوں کے تحفظ کے لئے تمام تر اقدامات کئے گئے ہیں۔ مریم نواز شریف نے جنوبی پنجاب میں غذائی قلت کے شکار بچوں کیلئے سکول میل پروگرام شروع کرنے کا ذکر کرتے ہوئے کہا کہ یہ پروگرام اس لئے شروع کیا گیا تاکہ بھوک تعلیم کی راہ میں حائل نہ ہو، سرکاری سکولوں میں بھی بچوں کو تمام ضروری سہولتیں فراہم کی جا رہی ہیں اور خصوصی بچوں کیلئے مصنوعی اعضا اور وِیل چیئرز فراہم کئے جا رہے ہیں۔ وزیراعلیٰ پنجاب نے کہا اگر کوئی بچہ محروم، لاچار یا نظر انداز دکھائی دے تو نیند نہیں آتی، جب تک ہر بچے کی آنکھ میں خوبصورت مستقبل کی چمک نہیں آتی، جدوجہد مکمل نہیں ہو گی، پنجاب کا ہر بچہ پڑھے گا، صحت مند ہو گا، مسکرائے گا، ماں اپنے بچوں کو کبھی تنہا نہیں چھوڑتی۔