میو ہسپتال میں جدید کینسر ٹریٹمنٹ مشین فعال، مریضوں کا علاج شروع

11-19-2025

(ویب ڈیسک) میو ہسپتال میں کینسر کے علاج کیلئے نصب کی گئی جدید ترین مشین باضابطہ طور پر فعال ہو گئی جس کے ذریعے مریضوں کا علاج تیزی اور کامیابی کے ساتھ جاری ہے۔

یہ پاکستان میں اپنی نوعیت کی پہلی مشین ہے جو وزیراعلیٰ پنجاب مریم نواز کی چین کے حالیہ دورے کے دوران خصوصی ہدایت پر منگوائی گئی، اس جدید مشین کے ذریعے کئے جانے والے علاج سے اب تک 18 مریض مکمل صحت یاب ہو چکے ہیں۔ کنگ ایڈورڈ میڈیکل یونیورسٹی کے وائس چانسلر ڈاکٹر محمود ایاز کا اپنے بیان میں کہنا تھا کہ مشین نہایت جدید ٹیکنالوجی سے لیس ہے اور کینسر کے مختلف اقسام کے مریضوں کا ’انتہائی کامیابی کے ساتھ علاج کیا جا رہا ہے، اگرچہ ایک مریض کے علاج پر تقریباً 16 لاکھ روپے لاگت آتی ہے مگر غریب مریضوں سے ایک پیسہ بھی وصول نہیں کیا جا رہا۔ کینسر اسپیشلسٹ پروفیسر شہزاد کریم بھٹی کا کہنا تھا کہ اس ٹیکنالوجی کے ذریعے گردوں، پھیپھڑوں، جگر اور بریسٹ کینسر کے سٹیج ون کا علاج ممکن ہے، ان کے مطابق اب تک 18 مریض صحت یاب ہو چکے ہیں، جو مشین کی افادیت کا واضح ثبوت ہے۔