آل پاکستان وکلاء ایکشن کمیٹی کا ملک بھر کے وکلاء سے آئینی عدالت کا بائیکاٹ کرنے کا مطالبہ

11-18-2025

(محمد اشفاق) لاہور ہائیکورٹ بار ایسوسی ایشن کے زیر اہتمام آل پاکستان وکلاء ایکشن کمیٹی کے اجلاس کا اعلامیہ جاری کر دیا گیا۔

اعلامیہ کے مطابق آل پاکستان وکلاء ایکشن کمیٹی نے ملک بھر کے وکلاء سے آئینی عدالت کا بائیکاٹ کرنے کا مطالبہ کر دیا، آل پاکستان وکلاء ایکشن کمیٹی وفاقی آئینی عدالت کو مسترد کرتی ہے۔ آل پاکستان وکلاء ایکشن کمیٹی کے مطابق سپریم کورٹ کی موجودگی میں کسی آئینی عدالت کی ضرورت نہیں ہے، جو اس غیر آئینی ادارے کا حصہ بنے گا وہ آئین، عدلیہ اور عوام کا مخالف تصور ہو گا۔ اعلامیہ کے مطابق آل پاکستان وکلاء ایکشن کمیٹی نے 26 ویں اور 27 ویں ترمیم کو یکسر مسترد کر دیا اور کہا کہ موجودہ ترامیم ائین کے بنیادی ڈھانچے پر غیر آئینی حملہ ہے۔ آل پاکستان وکلاء ایکشن کمیٹی کے مطابق موجودہ ترامیم بغیر کسی جائز عوامی مینڈیٹ اور بغیر عوامی تائید کے کی گئی، تمام بار ایسوسی ایشنز ہر جمعرات کو جنرل ہاؤس اجلاس کریں اور ریلیاں نکالیں۔ اعلامیہ کے مطابق آل پاکستان وکلاء ایکشن کمیٹی کنونشنز کے انعقاد کے لیے تمام بار ایسوسی ایشنز سے تعاون کرے گی۔