پنجاب حکومت نے ای ٹیکسی سکیم قرعہ اندازی سے متعلق شہریوں کو بڑی خوشخبری سنا دی

11-17-2025

(لاہور نیوز) پنجاب حکومت نے اعلان کیا ہے کہ ای ٹیکسی سکیم کی قرعہ اندازی نومبر کے آخری ہفتے میں کی جائے گی۔

حکام کے مطابق اب تک 28 ہزار سے زائد افراد اس سکیم کیلئے درخواست دے چکے ہیں، صوبائی محکمہ ٹرانسپورٹ نے درخواست گزاروں کا مکمل ڈیٹا بینک آف پنجاب کو بھجوا دیا ہے جو قرعہ اندازی کے عمل کی نگرانی کرے گا۔ قرعہ اندازی کے بعد منتخب درخواست گزاروں سے ڈاؤن پیمنٹ جمع کرانے کے لیے رابطہ کیا جائے گا، اس حوالے سے حکام  نے بتایا کہ مقررہ رقم جمع کروانے والے افراد کو تین سے چار ماہ کے اندران کی الیکٹرک ٹیکسیاں فراہم کر دی جائیں گی۔ واضح رہے کہ پنجاب حکومت نے 17 ستمبر کو ای-ٹیکسی سکیم 2025 کا آغاز کیا تھا جس میں درخواست گزاروں کیلئے پانچ سالہ بغیر سود کے فنانسنگ پلان متعارف کرایا گیا، پہلے مرحلے میں چین سے درآمد کی گئی 1,100 الیکٹرک ٹیکسیاں تقسیم کی جائیں گی جن میں سے 30 خواتین ڈرائیورز کے لیے مختص ہیں۔ سکیم کے نفاذ کیلئے حکومت چارجنگ نیٹ ورک قائم کر رہی ہے اور درخواستوں اور مستقبل کی دستاویزات کے عمل کو بہتر بنانے کے لیے ایک آن لائن پورٹل بھی تیار کیا گیا ہے۔