گورنر پنجاب نے خورشید احمد ندیم کو دیوان بہادر ایس پی سنگھا ایوارڈ دے دیا

11-16-2025

(لاہور نیوز) گورنر پنجاب نے رحمت للعالمین اتھارٹی کے چئیرمین خورشید احمد ندیم کو دیوان بہادر ایس پی سنگھا ایوارڈ دے دیا۔

گورنر پنجاب سردار سلیم حیدر نے رحمت للعالمین اتھارٹی کے چئیرمین خورشید احمد ندیم کو دیوان بہادر ایس پی سنگھا ایوارڈ 2025 دیتے ہوئے اقلیتوں کے حقوق اور بین المذاہب ہم آہنگی کے لیے ان کی خدمات پر انہیں خراج تحسین پیش کیا۔ دیوان بہادر ایس پی سنگھا ایوارڈ 2025 "اسلام اور اقلیتیں" کتاب کو دیا گیا، یہ کتاب رحمت للعالمین اتھارٹی کے چئیرمین خورشید احمد ندیم اور علامہ اقبال اوپن یونیورسٹی کے پروفیسر ڈاکٹر ریاض محمود مشترکہ تصنیف ہے جسے رحمت للعالین اتھارٹی نے شائع کیا ہے ۔ کتاب میں پاکستان میں اقلیتوں کے حقوق، آئینی مساوات اور سماجی ہم آہنگی سے متعلق مباحث شامل ہیں۔  گورنر پنجاب نے تقریب سے خطاب کرتے ہوئے کہا کہ قومی رحمت للعالمین و خاتم النبیین اتھارٹی نے بین المذاہب احترام، کردار سازی اور امن کے فروغ کے حوالے سے نمایاں کام کیا ہے۔ انہوں نے اتھارٹی کے زیرِ اہتمام رحمت اللعالمین اقلیتی کلب اور تعلیمی سرگرمیوں کا بھی ذکر کیا۔  خورشید احمد ندیم نے کہا کہ اقلیتوں کے حقوق، انصاف اور باہمی احترام ریاستی اور مذہبی دونوں حوالوں سے اہم اصول ہیں جبکہ اہم سماجی اور علمی شخصیات نے خورشید ندیم اور ڈاکٹر ریاض محمود کو ایوارڈ حاصل کرنے پر مبارک باد پیش کرتے ہوئے کہا کہ رحمت للعالمین اتھارٹی معاشرے میں تعلیم، تربیت اور اقدار کے لیے اہم ترین کام کر رہی ہے۔