پنجاب بھر میں ڈینگی مچھر کے وار، مزید 54 افراد متاثر

11-16-2025

(لاہور نیوز) پنجاب میں ڈینگی مچھر کے حملے تیزی سے جاری ہیں اور صوبے بھر میں ڈینگی کیسز میں روز بروز اضافہ دیکھا جا رہا ہے۔

صوبائی محکمہ صحت کے مطابق گزشتہ 24 گھنٹوں میں پنجاب میں مزید 54 افراد ڈینگی کا شکار ہوئے، لاہور میں ایک روز کے دوران 15 نئے مریض رپورٹ ہوئے۔ شہر میں ڈینگی کے کنفرم کیسز کی مجموعی تعداد 693 تک جا پہنچی ہے، پنجاب بھر میں کنفرم مریضوں کی تعداد بڑھ کر 3 ہزار 811 ہو گئی ہے۔ صوبائی وزیر صحت کی جانب سے شہریوں کو ایک بار پھر احتیاطی تدابیر اختیار کرنے کی ہدایت جاری کی گئی ہے۔ وزیر صحت خواجہ عمران نذیر  نے کہا ہے کہ شہری ڈینگی سے بچاؤ کے ایس او پیز پر سختی سے عمل کریں، گھروں میں سپرے کو یقینی بنائیں اور باہر جاتے ہوئے ریپیلنٹ لوشن کا استعمال لازمی کریں۔ محکمہ صحت  نے شہریوں سے اپیل کی ہے کہ گھروں، چھتوں، گلیوں اور قریبی خالی پلاٹس میں بارش یا بیکار پانی جمع نہ ہونے دیں کیونکہ یہی جگہیں ڈینگی مچھر کی افزائش کا بنیادی سبب بنتی ہیں۔