ڈی ایس پی کاہنہ کی بیوی اور بیٹی کی گمشدگی کا معمہ حل نہ ہو سکا

11-15-2025

(لاہور نیوز) لاہور کے علاقے کاہنہ کے ڈی ایس پی عثمان حیدر کی بیوی سمیعہ اور بیٹی حماس عثان کا ڈیڑھ ماہ سے گمشدہ ہونے کا معمہ ابھی تک حل نہ ہو سکا۔

پولیس کی متعدد ٹیمیں دونوں افراد کی تلاش میں فیصل آباد اور بہاولپور روانہ کر دی گئی ہیں، پولیس نے لاپتہ ماں اور بیٹی کی فون کال ریکارڈ حاصل کر کے تحقیقات کا آغاز کر دیا ہے، ریکارڈز کی مدد سے خاندان کے رشتہ داروں کے بیانات بھی قلمبند کئے جا رہے ہیں۔ ڈی ایس پی عثمان حیدر  نے اپنی بیوی اور بیٹی کی گمشدگی کی رپورٹ تھانہ برکی میں درج کرائی تھی جس کے بعد پولیس  نے تحقیقات کا آغاز کیا، تاہم، پولیس ذرائع کے مطابق ابھی تک لاپتہ ماں اور بیٹی کے بارے میں کوئی واضح سراغ نہیں مل سکا ہے۔ دوسری طرف ڈی ایس پی عثمان حیدر کی فیملی کی گمشدگی نے پولیس کے ساتھ ساتھ علاقے میں بھی تشویش کی لہر دوڑا دی ہے، پولیس کا کہنا ہے کہ تحقیقات کے دائرہ کار کو بڑھا دیا گیا ہے اور یہ امید ظاہر کی جا رہی ہے کہ جلد ہی اس معمہ کا حل سامنے آ جائے گا۔