لاہور ہائیکورٹ میں 27 ویں آئینی ترمیم کے خلاف درخواست دائر

11-15-2025

(لاہور نیوز) لاہور ہائیکورٹ میں 27 ویں آئینی ترمیم کے خلاف درخواست دائر کر دی گئی ہے۔

درخواست میں وکلا کی جانب سے مؤقف اپنایا گیا کہ یہ ترامیم آئین کے بنیادی ڈھانچے سے متصادم ہیں اور 1973 کے آئین کی روح کے خلاف ہیں۔ درخواست گزاروں میں منیر احمد اور میاں شبیر اسماعیل شامل ہیں، جنہوں نے اپنے دائر کردہ کیس میں کہا کہ یہ ترامیم سپریم کورٹ کے اصل اختیار کو ختم کر کے وفاقی آئینی عدالت کو اوپر بٹھا دیتی ہیں، جو آئین کے مطابق درست نہیں۔ ان کا کہنا تھا کہ اس اقدام سے سپریم کورٹ کی حیثیت کمزور پڑ سکتی ہے اور عدلیہ کی آزادی متاثر ہونے کا شدید خطرہ ہے۔  درخواست میں مؤقف اپنایا گیا کہ موجودہ اسمبلی حقیقی آئین ساز اسمبلی نہیں، اسے اتنی بڑی ترامیم کا اختیار حاصل نہیں، درخواست میں یہ بھی لکھا گیا ہے کہ ترامیم اسلامی دفعات، عدالتی خودمختاری اور بنیادی حقوق کے خلاف ہیں۔