اعظم خان نے 2 ماہ میں حیران کن حد تک وزن کم کر لیا

11-12-2025

(ویب ڈیسک) نوجوان وکٹ کیپر بیٹر اعظم خان نے اپنی فٹنس کے حوالے سے حیران کن انکشاف کیا ہے۔

اعظم خان، جو طویل عرصے سے موٹاپے کے باعث تنقید کی زد میں رہے، نے سماجی رابطوں کی ویب سائٹ پر اپنی تصویر شیئر کی ہے۔ انسٹاگرام اسٹوری میں اعظم خان نے بتایا کہ انہوں نے گزشتہ 2 ماہ میں 15 کلو وزن کم کیا ہے اور وہ وزن میں مزید کمی اور جسمانی فٹنس بہتر بنانے کے لیے مسلسل محنت کر رہے ہیں۔ انہوں نے لکھا، “15 ہزار گرام ہلکا ہو گیا ہوں، ابھی مزید وزن گراؤں گا، ان شاءاللہ۔” اعظم خان  نے 2021 میں پاکستان کی جانب سے ٹی ٹوئنٹی انٹرنیشنل ڈیبیو کیا تھا، تاہم انہیں موقعے محدود ملے۔ فاسٹ بالرز کے خلاف مشکلات اور غیر تسلی بخش کارکردگی کے باعث کئی بار ٹیم سے باہر کیے گئے۔ اگرچہ ان کا وزن اور کمزور وکٹ کیپنگ ہمیشہ سے عوامی بحث کا موضوع بنی رہی ہے، لیکن ڈومیسٹک اور فرنچائز کرکٹ میں اعظم نے خود کو ایک پاور ہٹنگ مڈل آرڈر بلے باز کے طور پر منوایا ہے۔ اعظم خان کا کہنا ہے کہ وہ وزن میں مزید کمی اور میچ فٹنس پر بھرپور توجہ دے رہے ہیں تاکہ وکٹ کے پیچھے کارکردگی اور رننگ میں بہتری لائی جا سکے۔