نادرا کی بلا ضرورت اصل دستاویزات کی فوٹو کاپی کرانے سے گریز کی ہدایت

11-12-2025

(ویب ڈیسک) قومی شناختی کارڈز اور دیگر دستاویزات کے اجرا کے حوالے سے نادرا حکام نے شہریوں کیلئے اہم ہدایات جاری کر دی ہیں۔

نادرا کے ترجمان کے مطابق شہریوں کو ہدایت کی گئی ہے کہ وہ بلاضرورت اپنی اصل دستاویزات کی فوٹو کاپی نہ کرائیں بلکہ نادرا دفاتر میں صرف اصل دستاویزات دکھائیں۔ ترجمان  نے وضاحت کی کہ نادرا کی جاری کردہ دستاویزات جیسے شناختی کارڈ، ایف آر سی اور ب فارم کیلئے شہریوں کو اصل دستاویزات ساتھ لانے کی ضرورت نہیں، بلکہ ان پر درج نمبر فراہم کرنا کافی ہے۔ البتہ دیگر سرکاری اداروں کی جاری کردہ مطلوبہ دستاویزات (مثلاً ڈومیسائل، پیدائش سرٹیفکیٹ، نکاح نامہ وغیرہ) کو ساتھ لانا ضروری قرار دیا گیا ہے۔ نادرا حکام کے مطابق تمام دستاویزات کو سکین کرنے کے بعد شہریوں کو فوراً واپس کر دیا جائے گا، شہریوں سے کہا گیا ہے کہ وہ غیر ضروری فوٹو کاپیوں سے گریز کریں تاکہ وقت اور وسائل کی بچت ہو سکے۔