نمونیا سے بچاؤ کا عالمی دن آج منایا جا رہا ہے

11-12-2025

(لاہور نیوز) دنیا بھر کی طرح پاکستان میں بھی نمونیا سے بچاؤ کا عالمی دن آج منایا جا رہا ہے۔

اس دن کے منانے کا مقصد عوام میں اس مہلک مرض سے متعلق آگاہی پیدا کرنا اور احتیاطی تدابیر پر عملدرآمد کی ترغیب دینا ہے۔ ماہر امراضِ سینہ (پلمونالوجسٹ) ڈاکٹر حسین کے مطابق سردیوں کے موسم میں بچوں اور بزرگوں میں نمونیا کے خطرات بڑھ جاتے ہیں، کھانسی، سانس پھولنا یا اکھڑنا نمونیا کی نمایاں علامات ہیں۔ ڈاکٹر حسین  نے شہریوں کو مشورہ دیا کہ اگر سانس لینے میں دشواری، کھانسی یا بلغم آنے کی شکایت ہو تو فوری طور پر معالج سے رجوع کریں۔ ان کا کہنا تھا کہ جن افراد کو مختلف دائمی امراض لاحق ہیں، انہیں نمونیا سے بچاؤ کی ویکسین ضرور لگوانی چاہئے۔ ڈاکٹر حسین  نے مزید کہا کہ شہری سردی سے بچاؤ، مناسب لباس کے استعمال، ہاتھوں کی صفائی اور متوازن غذا کے ذریعے بھی اس مرض سے محفوظ رہ سکتے ہیں۔