لاہور ہائیکورٹ: سی سی ڈی کی تحویل سے 5 سالہ بچی بازیاب

11-11-2025

لاہور:(محمداشفاق) سی سی ڈی پولیس چوری و ڈکیتی کے دو ملزموں کی گرفتاری کے دوران 5سالہ بچی کو بھی ساتھ لے گئی۔

دادی 5سالہ پوتی کی بازیابی کے لیے لاہور ہائی کورٹ پہنچ گئی۔ جسٹس  اسجد جاوید گھرال  نے 5 سالہ بچی کو سی سی ڈی سے لے کر دادی کے حوالے کرنے کا حکم دے دیا۔ لاہور ہائیکورٹ کے جسٹس اسجد جاوید گھرال نے کیس پر سماعت کی۔ درخواست گزار کی جانب سے ایڈووکیٹ سیدہ شاہدہ ارشد نے عدالت میں دلائل دیے۔ وکیل نے موقف اختیار کیا کہ سی سی ڈی نے چھاپے کے دوران مختلف الزامات میں دوسگے بھائیوں کو گھر سے گرفتار کیا تو ساتھ  5سالہ بچی تحریم کو لے گئے، ابھی تک گرفتار کیے جانے والے دونوں بھائیوں اور 5سالہ بچی کا کچھ پتہ نہیں چل سکا، عدالت بازیابی کا حکم دے۔ سرکاری وکیل نے رپورٹ جمع کروا دی جبکہ سی سی ڈی نے 5سالہ تحریم کو جسٹس اسجد جاوید گھرال کی عدالت میں پیش کردیا۔  سرکاری وکیل نےبتایا کہ پولیس نے قاسم، فخر عباس کو 10 اکتوبر 2025 کو بچی سمیت گھر سےاٹھایا،6 نومبر کو قاسم مقابلے میں ہلاک ہوگیا جبکہ فخر عباس کو زخمی حالت میں ہسپتال داخل کروایا گیا ہے ،عدالت نے زخمی فخر عباس کی حفاظت کو یقینی بنانے کی ہدایت کردی ۔ عدالت نے بچی کو لواحقین کے حوالے کرنے کا حکم دیتے ہوئے درخواست نمٹا دی۔