نان بائیوں کا ہڑتال کا دائرہ پنجاب بھر میں پھیلانے کا اعلان

11-07-2025

(ویب ڈیسک) نان بائیوں نے ہڑتال کا دائرہ پنجاب بھر میں پھیلانے کا اعلان کر دیا۔

نان بائیوں کی ہڑتال کے باعث شہریوں کو شدید مشکلات کا سامنا ہے اور گھروں میں دوبارہ روٹیاں پکانے کا سلسلہ شروع ہو گیا ہے، ہڑتال کے باعث شہریوں کی جانب سے بیکریوں سے رس ، بن اور شیر مال کی خریداری میں اضافہ ہو گیا ہے۔ صدر نان بائی ایسوسی ایشن شفیق قریشی کا کہنا ہے کہ ہم جیل بھرو تحریک شروع کرنے جا رہے ہیں، ہم 10500 روپے بوری سرخ آٹا خرید کر 14 روپے روٹی اب فروخت نہیں کرینگے، موجودہ حکومت آئی تو آٹا سرخ بوری 5500 روپے سے 10500 روپے ہو گیا جبکہ میدہ (فائن آٹا) بوری 6200 روپے تھی اور آج 12 ہزار روپے ہو گئی ہے۔ ان کاکہنا ہے کہ  تنوروں کو جرمانے 50 ہزار روپے سے ایک لاکھ روپے تک کئے جاتے ہیں، پنجاب انفورسمنٹ ریگولیٹری اتھارٹی کا رویہ انتہائی توہین آمیز ہوتا ہے، انتظامیہ سے مذاکرات کا کوئی فائدہ نہیں، جیل بھرو تحریک اور ہڑتال پنجاب بھر میں وسیع کرنے کیلئے آج اہم اجلاس ہو رہا ہے۔