ٹاؤن شپ کے ڈپو سٹاپ پر ریس لگاتی ٹرالیاں حادثے کا شکار

11-07-2025

(لاہور نیوز) ٹاؤن شپ ڈپو سٹاپ پر دو ٹرالیاں ریس لگاتے ہوئے حادثے کا شکار ہو گئیں۔

عینی شاہدین کے مطابق دونوں ٹرالیاں شدید تیز رفتاری سے چل رہی تھیں کہ اچانک ایک ٹرالی فٹ پاتھ پر چڑھ گئی، جبکہ دوسری ٹرالی الٹ گئی، حادثے کے باعث ڈپو سٹاپ پر ٹریفک کی روانی بری طرح متاثر ہوئی اور شہریوں کو شدید مشکلات کا سامنا کرنا پڑا۔ حادثے کی وجہ سے ٹاؤن شپ ڈپو سٹاپ پر کئی گھنٹوں تک ٹریفک جام رہا، اس دوران نہ تو ٹریفک وارڈنز کی موجودگی تھی اور نہ ہی فوری طور پر کسی انتظامی کارروائی کا آغاز ہو سکا جس کی وجہ سے شہریوں کو شدید پریشانی کا سامنا کرنا پڑا۔ ریسکیو ذرائع کے مطابق خوش قسمتی سے دونوں ٹرالیوں کے ڈرائیور حادثے میں محفوظ رہے اور کوئی جانی نقصان نہیں ہوا، ریسکیو ٹیموں  نے موقع پر پہنچ کر فوری طور پر ٹرالیوں کو راستے سے ہٹا لیا، لیکن اس دوران ٹریفک کی روانی متاثر ہونے کی وجہ سے گاڑیوں کی طویل قطاریں لگ گئیں۔