پی آئی اے اور انجینئرز کے درمیان تنازعہ، صدر و سیکرٹری جنرل برطرف

11-06-2025

(لاہور نیوز) پاکستان انٹرنیشنل ایئرلائنز (پی آئی اے) اور سوسائٹی آف ایئرکرافٹ انجینئرز (سی اے ای) کے درمیان تنازعہ شدت اختیار کر گیا جس کے نتیجے میں سی اے ای کے صدر عبداللہ جدون اور سیکرٹری جنرل اویس جدون کو ملازمت سے برطرف کر دیا گیا۔

پی آئی اے کے حکمنامے کے مطابق عبداللہ جدون اور اویس جدون کو آج ملازمت سے برطرف کرنے کے احکامات جاری کئے گئے ہیں، دونوں عہدیداران کے خلاف انکوائری کا آغاز گزشتہ سال کیا گیا تھا اور انہیں 4 اور 5 نومبر 2024 کو ذاتی شنوائی کیلئے پیش ہونے کا موقع دیا گیا تھا، تاہم، دونوں عہدیداران سی ای او پی آئی اے کے سامنے پیش نہ ہوئے جس کے بعد ان کے خلاف کارروائی کی گئی۔ پی آئی اے کے مطابق عبداللہ جدون اور اویس جدون کے خلاف یہ کارروائی پی آئی اے کے متعلقہ قوانین کے تحت کی گئی ہے، انکوائری میں طیاروں کی فنی خرابیوں، قوانین کی خلاف ورزی اور انجینئرز کی جانب سے خرابیوں کے باوجود طیاروں کو کلیئرنس نہ دینے جیسے الزامات سامنے آئے ہیں، ان الزامات کے تناظر میں دونوں عہدیداران کی برطرفی کا فیصلہ کیا گیا۔ سوسائٹی آف ایئرکرافٹ انجینئرز کے سیکرٹری جنرل اویس جدون نے برطرفی کے فیصلے کو عدالت میں چیلنج کرنے کا اعلان کیا ہے، انہوں نے کہا کہ ان فیصلوں کو موجود دستاویزات کے تحت عدالت میں چیلنج کیا جائے گا، پی آئی اے انتظامیہ نے جو کارروائی کی ہے وہ بے بنیاد ہے اور اس کا مقصد انجینئرز کی جانب سے اٹھائے جانے والے حالیہ احتجاج کو دبانا ہے۔