ہوا کی بہتری سے سموگ میں کمی، اے کیو آئی میں نمایاں فرق

11-05-2025

(لاہور نیوز) لاہور میں سموگ کی صورتحال میں گزشتہ رات کے مقابلے میں واضح بہتری دیکھنے کو ملی ہے، جہاں آج صبح 12 بجے اے کیو آئی 160 ریکارڈ کیا گیا، جبکہ گزشتہ رات یہ 390 تھا۔

محکمہ ماحولیات کے مطابق اے کیو آئی میں کمی کی وجہ ہوا کی سمت اور رفتار ہے جس  نے آلودگی کے ذرات کو پھیلنے سے روکا ہے۔ سینئر صوبائی وزیر مریم اورنگزیب کا کہنا ہے کہ گزشتہ سال کی نسبت اس سال اے کیو آئی میں نمایاں بہتری آئی ہے، ہوا کی رفتار 11 کلومیٹر فی گھنٹہ ہونے کی وجہ سے آلودگی کے ذرات منتشر ہو رہے ہیں جس سے لاہور کی فضائی معیار میں بتدریج بہتری آئی ہے۔ حکومتی اقدامات اور موسمی حالات کے باعث شہریوں کو نسبتاً بہتر فضا میسر آ رہی ہے، محکمہ ماحولیات کا کہنا ہے کہ موجودہ ہوا کی رفتار فضائی آلودگی میں کمی کیلئے معاون ثابت ہو رہی ہے۔ شہریوں کو مشورہ دیا گیا ہے کہ فضا میں بہتری کے باوجود غیر ضروری سفر سے گریز کریں اور کوڑا کرکٹ کو آگ نہ لگائیں تاکہ سموگ کی صورتحال مزید بہتر ہو سکے۔