پنجاب حکومت کا عارضی بنیادوں پر طبی ماہرین بھرتی کرنے کا فیصلہ

11-04-2025

(لاہور نیوز) پنجاب حکومت نے صوبے میں طبی عملے کی کمی کو پورا کرنے کیلئے عارضی بنیادوں پر ماہرینِ صحت بھرتی کرنے کا فیصلہ کر لیا۔

اس سلسلے میں پنجاب لوکم ہائیرنگ ایکٹ 2025 پنجاب اسمبلی سے گزشتہ روز منظور کر لیا گیا, بل کے مطابق صوبے میں "لوکم پالیسی کمیٹی" تشکیل دی جائے گی، جس کی چیئرپرسن صوبائی وزیر سپیشلائزڈ ہیلتھ کیئر اور وائس چیئرپرسن سیکرٹری سپیشلائزڈ ہیلتھ کیئر ہوں گے، جبکہ تین طبی ماہرین اور ہیومن ریسورس کے نمائندے کمیٹی کے ممبران ہوں گے۔ بل کے متن کے مطابق کمیٹی صحت کے شعبے میں عملے کی کمی کی نشاندہی کرے گی اور عارضی بھرتیوں کے ٹی او آرز تیار کرے گی، کمیٹی بھرتی کی مدت، تنخواہ، مراعات اور معاہدے کے خاتمے سے متعلق شقیں طے کرے گی۔ بل میں کہا گیا ہے کہ بھرتی کا عمل مکمل طور پر شفاف طریقے سے کیا جائے گا اور بھرتی سے قبل کم از کم دو اخبارات میں اشتہار دینا لازم ہو گا، اشتہارات میں بھرتی کا مکمل طریقہ کار واضح طور پر درج کیا جائے گا۔ بل کے مطابق عارضی بنیادوں پر بھرتی ہونے والے افراد مستقل ملازمت کا دعویٰ نہیں کر سکیں گے اور انہیں محکمہ صحت کے مستقل ملازمین کے مساوی مراعات حاصل نہیں ہوں گی، مزید برآں، بھرتیوں کی مدت میں توسیع یا خاتمے کا اختیار بھی پالیسی کمیٹی کے پاس ہو گا۔ بل کے متن میں کہا گیا ہے کہ اس قانون کا مقصد شعبہ صحت میں عملے کی کمی کو ہنگامی بنیادوں پر پورا کرنا ہے، تاکہ ہسپتالوں اور طبی مراکز میں مریضوں کو بہتر سہولیات فراہم کی جا سکیں۔