پنجاب سموگ کی لپیٹ میں، لاہور کا آلودہ شہروں میں پہلا نمبر، آج بادل برسنے کا امکان

11-04-2025

(لاہور نیوز) پنجاب بدستور بد ترین سموگ کی لپیٹ میں ہے، لاہور فضائی آلودگی میں دنیا میں پھر سر فہرست ہے، آج شہر میں بادل برسنے کے امکانات ہیں۔

لاہور کا ایئر کوالٹی انڈیکس 372 تک پہنچ گیا، لاہور کے علاقے رائیونڈ میں 587، گلبرگ 581، لوئر مال 552 اور ڈی ایچ اے کا اے کیو آئی 478 ریکارڈ کیا گیا ہے۔ محکمہ موسمیات کے مطابق آج لاہور شہر کا کم سے کم درجہ حرارت 16 اور زیادہ سے زیادہ 31 سینٹی گریڈ تک جانے کا امکان ہے، آج اور کل شہر میں وقفے وقفے سے بادل برسیں گے، بارش کے باعث آلودگی میں واضح کمی ریکارڈ کی جائے گی۔ اس کے علاوہ گوجرانوالہ 280، ملتان کا ایئر کوالٹی انڈیکس 210 کو چھو گیا، سیالکوٹ 184، فیصل آباد 251، پشاور کا اے کیو آئی 196 ریکارڈ کیا گیا۔ دوسری جانب پنجاب حکومت اور محکمہ ماحولیات نے کارروائیاں تیز کر دیں، آلودگی پھیلانے والے متعدد صنعتی یونٹس منہدم اور فیکٹریاں سیل کر دی گئیں، 41 جدید ایئر کوالٹی مانیٹرنگ سسٹمز فعال کر دیئے، ڈرون سکواڈ تعینات کر دیا گیا، سموگ فری زونز قائم کر دیا۔ سینئر وزیر پنجاب مریم اورنگزیب کا کہنا ہے صاف فضا ہر شہری کا حق ہے، حکومت پائیدار اقدامات کے ذریعے سموگ کے مستقل خاتمے کیلئے پرعزم ہے۔