سموگ میں مزید اضافہ، پنجاب کی فضا انتہائی مضر صحت،ڈرائی سویپنگ پر پابندی

10-30-2025

(لاہور نیوز) پنجاب کے مختلف شہروں میں سموگ کی شدت میں اضافہ ہوگیا۔

سموگ کی شدت کے باعث فیصل آباد، گوجرانوالہ، سیالکوٹ اور ملتان میں فضا انتہائی مضر صحت ہوگئی، لاہور بدستور دنیا کے آلودہ شہروں میں سرفہرست رہا، ایئر کوالٹی انڈیکس 603 کو چھو گیا۔ صوبائی دارالحکومت کے علاقے علامہ اقبال ٹاؤن میں ایئر کوالٹی انڈیکس 1059، ڈی ایچ اے 1021، ساندہ روڈ پر 818 ریکارڈ کیا گیا ہے، اس کے علاوہ فیصل آباد کا ایئر کوالٹی انڈیکس 685 تک پہنچ گیا، گوجرانوالہ میں اے کیو آئی 555 اور ملتان میں  364 ریکارڈ کیا گیا۔ محکمہ ماحولیات نے انسداد سموگ اقدامات تیز کر دیئے ، پبلک مقامات اور اہم شاہراہوں پر ڈرائی سویپنگ پر پابندی لگا دی، شاہراہوں پر چونے سے صفائی کرنے پر بھی مکمل پابندی عائد کردی گئی۔