علیمہ خان پھر غیر حاضر، شناختی کارڈ، پاسپورٹ بلاک اور بینک اکاؤنٹس منجمد کرنے کا حکم

10-24-2025

(لاہور نیوز) انسداد دہشت گردی عدالت راولپنڈی نے وارنٹ گرفتاری کے باوجود علیمہ خان کے پیش نہ ہونے پر شناختی کارڈ اور پاسپورٹ بلاک اور بینک اکاؤنٹ منجمد کرنے کا حکم دے دیا۔

انسداد دہشت گردی عدالت میں  راولپنڈی کے علاقہ صادق آباد کے نومبر احتجاج کے مقدمہ کی سماعت ہوئی، جو جج امجد علی شاہ نے کی، سماعت کے دوران دس ملزمان حاضر تھے، بانی تحریک انصاف عمران خان کی بہن علیمہ خان غیر حاضر تھیں۔ عدالت نے علیمہ خان کا مچلکہ ضبط کر لیا جبکہ علیمہ خان کا ضامن مفرور ہونے پر عدالت نے ضامن کی جانب سے پیش کردہ جائیداد قرق کرنے کا حکم جاری کر دیا۔ انسداد دہشت گردی عدالت راولپنڈی نے ڈی جی نادرا کو حکم دیا کہ علیمہ خان کا قومی شناختی کارڈ بلاک کیا جائے، ڈی جی پاسپورٹ کو علیمہ خان کا پاسپورٹ بلاک کرنے کا حکم دیا، گورنر سٹیٹ بینک کو حکم جاری کیا کہ علیمہ خان کے تمام بینک اکاؤنٹس منجمد کئے جائیں۔ عدالت نے ریمارکس دیئے کہ ملزمہ ہر جگہ موجود ہوتی ہے،عدالت پیش نہیں ہوتی، ملزمہ کی حاضری ہر صورت یقینی بنائی جائے گی، عدالت نے مقدمہ کی سماعت پیر 27اکتوبر تک ملتوی کر دی۔