شہر میں ڈاکو پھر بے لگام، تاجر کو اسلحہ کے زور پر لوٹ لیا

10-23-2025

(لاہور نیوز) شہر میں جرائم کی بڑھتی ہوئی لہر اور پولیس کی ناکامی کا ایک اور افسوسناک واقعہ سامنے آیا ہے۔

حالیہ دنوں میں ڈاکوؤں کی جانب سے ایک اور ڈکیتی کی واردات نے شہر کے امن کو چیلنج کر دیا ہے، یہ ڈکیتی کی واردات تھانہ گرین ٹاؤن کی حدود میں علی چوک کالج روڈ پر پیش آئی۔ متاثرہ تاجر اختر حیات کے مطابق دو دن قبل نامعلوم مسلح ڈاکوؤں  نے انہیں اسلحہ کے زور پر لوٹ لیا، ڈاکوؤں نے تاجر سے 35 لاکھ روپے نقدی چھین کر فرار ہونے میں کامیابی حاصل کر لی۔ اختر حیات نے پولیس کو اپنی رپورٹ میں بتایا کہ یہ رقم وہ ایک پلازہ مالک کو پلازہ خریدنے کی مد میں ادا کرنے والے تھے، تاہم ڈاکوؤں نے ان کے تمام ارمانوں کو پلک جھپکتے میں چھین لیا۔ پولیس کے مطابق اس واردات کے بعد پولیس کی طرف سے گرین ٹاؤن میں مقدمہ درج کر لیا گیا ہے، لیکن اب تک ڈاکوؤں کا کوئی سراغ نہیں مل سکا، پولیس کی مختلف ٹیمیں اس کیس کی تحقیقات کر رہی ہیں لیکن یہ واضح نہیں ہو سکا کہ ڈاکو کہاں سے آئے تھے اور ان کا اصل مقصد کیا تھا۔